DAŞKƏND LİTSEYİNDƏ AZƏRBAYCAN MƏDƏNİYYƏTİ HƏFTƏSİ
Respublikamızın gerbi, bayrağı asılmış salonda Azərbaycanın və Özbəkistanın dövlət himnləri səsləndikdən sonra litseyin direktoru Qinara Ziyəddinova mədəniyyət həftəsini açaraq demişdir: Biz bir neçə ildir ki, YUNESKO proqramı çərçivəsində “Dünya xalqları və onların mədəniyyəti” silsiləsindən müxtəlif tədbirlər keçiririk. İndiki mədəniyyət günlərini keçirməkdə məqsədimiz şagirdləri dost və qardaş Azərbaycan xalqının ədəbiyyatı, incəsənəti, mədəniyyəti və tarixi ilə tanış etməkdir.
Azərbaycanın Özbəkistandakı səfirliyinin müşaviri Surxay Əliyev məktəbin rəhbərliyinə minnətdarlığını bildirmiş, mədəniyyət günlərinin mənalı keçməsi üçün hər cür kömək edəcəklərini söyləmişdir.
Litseyin şagirdləri Azərbaycan dilində şerlər söyləmiş, milli rəqslərimizi ifa etmişlər.
Mədəniyyət günləri çərçivəsində şagirdlər Azərbaycanın müstəqillik illərində əldə etdiyi uğurlarla bağlı sənədli filmə baxmış, Daşkənddə yaşayan soydaşlarımız Sevil Əliyeva və Yusif Hüseynovun rəsm əsərlərindən ibarət sərgi ilə tanış olmuşlar.
Həftə ərzində litseyin şagirdləri “Yeddi oğul istərəm”, “Axırıncı aşırım”, “Şərikli çörək”, “Bizim Cəbiş müəllim” və digər filmlərə tamaşa etmişlər.
“Azərbaycanın tarixi, ədəbiyyatı, mədəniyyəti” adlı intellektual viktorinada qalib gələn şagirdlərə, habelə həftənin fəal iştirakçılarına səfirliyimiz adından fəxri fərmanlar və qiymətli hədiyyələr verilmişdir. Litseyə isə Azərbaycanın ədəbiyyatı, incəsənəti və tarixinə, Ermənistan-Azərbaycan, Dağlıq Qarabağ münaqişəsinə dair əlliyə yaxın kitab bağışlanmışdır.
Bölmənin digər xəbərləri
