CƏMİYYƏT
“DES” MMC-nin vəzifəli şəxsləri ilə bağlı cinayət işi üzrə zəruri istintaq-əməliyyat tədbirləri davam etdirilir
Bakı, 16 iyul (AZƏRTAC). Bakı şəhər sakini Asəf Hacı-İsmayılov və qeyriləri tərəfindən təsis edilmiş “DES” Məhdud Məsuliyyətli Cəmiyyətinin vəzifəli şəxsləri “Köhnə bakılılara yeni ev” şüarı altında sayt yaradıb, vətəndaşların etibarından sui-istifadə edərək dələduzluq yolu ilə onlara məxsus külli miqdarda əmlakı ələ keçirmək üçün guya paytaxtın mərkəzi prospektlərindən birində çoxmərtəbəli bina tikəcəkləri barədə həmin saytda və digər kütləvi informasiya vasitələrində reallıqdan uzaq elanlar, reklam xarakterli informasiyalar yerləşdiriblər.
Bakı Şəhər Prokurorluğunun və Baş Polis İdarəsinin AZƏRTAC-a daxil olan birgə məlumatında bildirilir ki, araşdırmalar zamanı “DES” MMC-nin sözügedən fəaliyyət növü ilə müvafiq lisenziya olmadan fəaliyyət göstərdiyi müəyyən edilib. Faktla bağlı Bakı Şəhər Baş Polis İdarəsinin İstintaq və Təhqiqat İdarəsində Cinayət Məcəlləsinin 178.3.2-ci maddəsi ilə cinayət işi başlanmış, adı çəkilən MMC-nin vəzifəli şəxsləri - Asəf Hacı-İsmayılov, Nazim Səmədov və Orxan Fərhadov şübhəli şəxs qismində tutulublar.
İstintaq-əməliyyat tədbirlərinin davamı olaraq Cəmiyyətin Bakı şəhəri, Badamdar qəsəbəsi, 156 ünvanında yerləşən ofisində aparılmış axtarış zamanı iş üçün əhəmiyyət kəsb edən sənədlər, möhür, ştamp, müqavilə və ərizə formaları, doqquz bloklu evin ümumi və ayrı-ayrı otaqlarının, mərtəbələrinin sxemləri, üç kompyuter və bir noutbuk, həmçinin 65 min və 25 min manat dəyərində mənzillərin alqı-satqısına dair iki nəfərlə imzalanmış müqavilələr, eləcə də 20-yə yaxın şəxsin müvafiq ərizələri götürülüb.
Tutulan şəxslərin ifadələrindən və digər sənədlərdən də göründüyü kimi, onların inşa edəcəkləri, ümumi dəyəri 17 milyon manatdan çox olan 16 mərtəbəli, 9 bloklu və 810 mənzilli binada həmin mənzillərin hər kvadratmetrinin sakinlərə guya 380 manata satılması nəzərdə tutulub.
Hazırda iş üzrə zəruri istintaq-əməliyyat tədbirləri davam etdirilir.