Bakı, 7 oktyabr, AZƏRTAC

Qazaxıstanın Aktau şəhərində fəaliyyət göstərən “Azərbaycan Etnomədəni Birliyi” ictimai təşkilatının sədri Şəmsəddin Hüseynovun adı “Qazaxıstanın Qızıl kitabı” ensiklopediyasına düşüb.

Diasporla İş üzrə Dövlət Komitəsindən AZƏRTAC-a bildiriblər ki, kitabda Şəmsəddin Hüseynovun həyatı, əmək və ictimai fəaliyyəti barədə ətraflı məlumat verilib. Soydaşımızın iş adamı, Mangistau vilayətinin Aktau şəhər Məsləhət Şurasının üzvü, şəhər nəzarət komitəsinin sədri kimi respublikanın iqtisadi-sosial həyatına önəmli töhfələr verdiyi, Aktau şəhərinin abadlaşdırılması və yerli əhalinin sosial-iqtisadi durumunun yaxşılaşdırılması istiqamətində həyata keçirilən layihələrin icrasında mühüm xidmətlər göstərdiyi nəzərə çatdırılıb.

Qeyd edək ki, “Qazaxıstanın Qızıl kitabı” ensiklopediyasında hər bir bölgənin tanınmış, gələcək nəslə örnək olan nəcib şəxsləri haqqında məlumatlar yer alıb.