Sentyabrın 6-da Bakı Dövlət Universitetində Türkiyənin “Doğan Holdinq” şirkətlər qrupunun rəhbəri, Türk dünyasının tanınmış iş adamı Aydın Doğana BDU-nun fəxri doktoru diplomunun təqdim edilməsi münasibətilə mərasim keçirilmişdir.

Mərasimi universitetin rektoru, professor Abel Məhərrəmov açaraq, Türk dünyası mədəniyyətinin və jurnalistikasının inkişafına böyük töhfələr vermiş qonağı Bakı Dövlət Universitetinin professor-müəllim heyəti və tələbələri adından səmimi salamladı.

Natiq dedi ki, Aydın Doğan ilk dəfə tələbə cəmiyyətinə başçılıq etməklə fəaliyyətə başlamış, sonra şəxsi şirkətini yaratmışdır. O,  “Milliyyət” qəzetinə başçılıq etmiş, Türkiyənin qəzet sahibləri birliyini yaratmışdır.  Onun başçılıq etdiyi Doğan Holdinq” qrupu bir neçə qəzet və televiziyaya sahibdir. “Bi-Bi-Si”, “Si-En-En” kimi dünya nəhəngləri ilə bir sıradadır. Müxtəlif təmayüllü 50-dən çox şirkəti birləşdirən bu qrupun müəssisələrində 15 min işçi çalışır. 

Türkiyədə çoxlu məktəb tikdirən, mədəniyyət ocaqları açan, xeyriyyə təşkilatları yaradaraq ehtiyacı olanlara əl tutan Aydın Doğan öz ölkəsində nüfuzlu şəxsiyyət, hörmət sahibi hesab olunur. O, 1999-cu ildə Türkiyə Cümhuriyyətinin “dövlət üstün xidmət medalı” ilə təltif edilmişdir.

 “Doğan Holdinq” qrupu Azərbaycanda da kütləvi informasiya vasitələrinin inkişafına kömək edir. Natiq ölkəmizdə latın əlifbasına keçildikdən sonra mətbuat sahəsində Azərbaycan-Türkiyə əlaqələrinin daha da inkişaf edəcəyinə və möhkəmlənəcəyinə əmin olduğunu vurğuladı.

Azərbaycan ilə Türkiyə arasında təhsil və elm sahəsində gündən-günə genişlənməkdə olan əlaqələrdən bəhs edən A.Məhərrəmov bildirdi ki, BDU qardaş ölkənin  Ankara, İstanbul, Qazi universitetləri, Ortadoğu Texniki Universiteti,  Yeni Yüzil, Krıkkala, Səlcuq, Bilkənd, İzmir universitetləri ilə sıx əlaqələr saxlayır. Türkiyənin hər yerindən Azərbaycana gələn, Bakı Dövlət Universitetində təhsil alan tələbələrin sayı ildən-ilə artır. BDU-da “Türkiyə və Azərbaycan gənclərinin dostluq cəmiyyəti” yaradılmışdır.

Hörmətli qonağa Bakı Dövlət Universitetinin tarixindən danışarkən rektor vurğuladı ki, görkəmli siyasətçi və dövlət xadimi,  Azərbaycan Prezidenti Heydər Əliyev də bu ali təhsil ocağını bitirmişdir. O, respublikamıza rəhbərlik etdiyi 30 il ərzindəelm və təhsilin inkişafına, o cümlədən BDU-ya daim diqqət və qayğı göstərmişdir.

Hörmətli qonağa məlumat verildi ki, yarandığı ilk ildə iki fakultəsi, 44 müəllimi olan Bakı Dövlət Universitetinin hazırda 16 fakultəsində 13 minə qədər tələbə oxuyur.Universitetin 130-dan çox kafedrasında 300-ə yaxın elmlər doktoru, professor, 800-dən çox elmlər namizədi, dosent çalışır.

Türkiyənin keçmiş prezidenti Süleyman Dəmirəl, dünya şöhrətli alim İhsan Doğramacı, Türkiyə Böyük Millət Məclisinin keçmiş sədri Yıldırım Akbulut, Doğru Yol Partiyasının sədri Tansu Çillər, xarici işlər naziri İsmayıl Cəm ayrı-ayrı illərdə Bakı Dövlət Universitetinin fəxri doktoru adı almışlar.

A. Məhərrəmov Aqdın Doğanın Bakı Dövlət Universiteti elmi şurasının qərarı ilə BDU-nun fəxri doktoru adına layiq görüldüyünü bildirərək, onu təhsil ocağının kollektivi adından təbrik etdi,gələcək fəaliyyətində uğurlar arzuladı. Rektor Bakı Dövlət Universitetinin fəxri doktoru diplomunu, xüsusi medalı və fəxri doktor mantiyasını, habelə xatirə hədiyyəsini - əl ilə toxunmuş xalçanı  Aydın Doğana təqdim etdi.  

Mərasimdə Azərbaycan Respublikası Milli Elmlər Akademiyasının həqiqi üzvü, BDU-nun kafedra müdiri Fuad Qasımzadə, BDU-nun jurnalistika fakultəsinin dekanı dosent  Yalçın Əlizadə çıxış edərək, Türk dünyasının tanınmış iş adamı Aydın Doğanı universitetinin fəxri doktoru adına layiq görülməsi  münasibətilə təbrik etdilər. Hörmətli qonağın öz xalqı, türk dünyası qarşısındakı xidmətlərindən danışdılar.

Mərasimdəçıxış edən  “Doğan Holdinq”  şirkətlər qrupunun rəhbəri Aydın Doğan Bakı Dövlət Universitetinin fəxri doktoru adına layiq görülməsini özü üçün şərəf hesab etdiyini bildirdi. Onu bu ada layiq görən universitetinin elmi şurasına, təhsil ocağının professor-müəllim heyətinə minnətdarlığını bildirdi. O dedi ki, mənə bu adı verən Bakı Dövlət Universiteti gənc yaşlarımdan bu günədək həsrətini çəkdiyim, xəyalımda yaşatdığım, çox yüksək dəyərləndirdiyim və həmişə görmək istədiyim bir universitetdir, gözəl bir akademik təhsil ocağıdır. Bu adı ömrüm boyu şərəflə daşıyacağam. 1919-cu ildə yaradılan bu universitet Türk dünyasının iftixarıdır. 

Aydın Doğan daha sonra dedi ki, ilk dəfədir Azərbaycana gəlmişəm. O,  kiçik yaşlarımdan iftixarla baxdığım bir ölkədir. Bizim üçün, sadəcə, dost ölkə deyil, qardaş ölkədir, qan qardaşlarımızın vətənidir. Azəri qardaşlarımız Türkiyədə də vardır. Mən Bakı Dövlət Universitetinin fəxri doktoru adını və diplomunu bu hisslərlə qəbul edirəm. Bu ad mənim üzərimə böyük vəzifələr və məsuliyyət qoyur. Mən özümü bu universitetin tələbəsi və fəxri doktoru hesab edirəm. Bütün həyatım boyu bu universitetlə bağlı olacağam və ona yardım göstərməyə çalışacağam.

                        X                             X                             X

Mərasimdə Prezidentin icra aparatının şöbə müdirlərti Fatma Abdullazadə, Əli Həsənov, təhsil naziri Misir Mərdanov və digər rəsmi şəxslər iştirak edirdilər.