Donald Tramp KXDR ətrafında hadisələrin inkişafından razıdır
Bakı, 27 may, AZƏRTAC
ABŞ Prezidenti Donald Tramp KXDR ətrafında hadisələrin inkişafından razı olduğunu deyib.
AZƏRTAC bu barədə xarici KİV-lərə istinadla xəbər verir.
“Hesab edirəm ki, Kim Çen In böyük iqtisadi qüvvəyə malik ölkə qurmaq istəyir. O da mənim kimi KXDR-in nəhəng iqtisadi potensialına inanır. Kim Çen In nüvə silahı ilə buna heç vaxt nail olmayacağını başa düşür. O çox ağıllı insandır”, - deyə ABŞ Prezidenti Yaponiyanın Baş Naziri Şindzo Abe ilə danışıqların nəticələrinə həsr olunan mətbuat konfransında bildirib.
Donald Tramp KXDR-in artıq iki ildir nüvə sınağı keçirmədiyini, lakin bu ölkəyə qarşı sanksiyaların əvvəlki kimi qaldığını vurğulayıb.
Tədbir Ağ evin saytında canlı yayımlanıb.
Xatırladaq ki, bir qədər əvvəl Cənubi Koreya Silahlı Qüvvələrinin birləşmiş qərargah rəisləri komitəsi KXDR-in iki reaktiv mərmini sınaqdan keçirdiyini bildirib. Raketlər Pxenyandan 77 kilometr şimal-qərbdə yerləşən Sinori qəsəbəsi rayonundan şərq istiqamətə atılıb və Şimali Koreya ərazisi üzərindən keçərək Yapon dənizinə düşüb.
Bölmənin digər xəbərləri
