DÖVLƏT DUMASI UKRAYNA İLƏ DOSTLUQ HAQQINDA MÜQAVİLƏNİ ŞÜBHƏ ALTINA ALIR
AZƏRTAC-ın xüsusi müxbiri xəbər verir ki, RF Dövlət Duması Prezident Dmitri Medvedevə və ölkə hökumətinə Ukraynanın NATO-ya daxil olacağı təqdirdə Rusiyanın bu ölkə ilə dostluq, əməkdaşlıq və tərəfdaşlıq haqqında müqavilədən çıxması məsələsini nəzərdən keçirməyi təklif etmişdir.
Mayın 5-də aşağı palatanın geniş iclasında Dövlət Duması ölkə rəhbərliyinə müraciət qəbul etmişdir. Sənəddə Ukraynanın NATO-ya üzvlüyə hazırlıq Planına qoşulacağı və ya alyansa daxil olmaq üçün digər addımlar atacağı təqdirdə bu addımları Ukraynanın Rusiya ilə dostluq, əməkdaşlıq və tərəfdaşlıq haqqında müqavilədən birtərəfli surətdə çıxması kimi qiymətləndirmək və Rusiya Federasiyasının bu müqavilədən çıxması məsələsinə baxmaq təklif olunur.
Dövlət Dumasının MDB işləri və həmvətənlərlə əlaqə Komitəsinin başçısı Aleksey Ostrovski demişdir: “Biz ölkə rəhbərliyinin diqqətini buna cəlb edirik ki, Ukrayna hakimiyyətinin, o cümlədən Ukraynanın NATO-ya qoşulmasının sürətləndirilməsi ilə bağlı fəaliyyəti Rusiyaya qarşı qeyri-dost mövqedir və ölkələrimiz arasında dostluq, əməkdaşlıq və tərəfdaşlıq haqqında müqavilənin şərtlərinə ziddir”.
Onun fikrincə, rəsmi Kiyev bu istiqamətdə yeni addımlar atarsa, NATO-nun növbəti zirvə görüşündə Ukrayna tərəfinin təşəbbüsü ilə ölkənin alyansa qoşulması məsələsi qaldırılarsa, deməli, Ukrayna özü Rusiya-Ukrayna müqaviləsini şübhə altına alır.
Rusiya parlamenti üzvlərinin fikrincə, Ukraynadakı rusiyalı həmvətənlərin, habelə Rusiya biznesinin hüquqlarının müdafiəsini gücləndirmək lazımdır. Rusiyanın Qara dəniz donanmasının respublika ərazisindən sıxışdırılması ilə bağlı ciddi narahatlıq ifadə olunan sənəddə, iki ölkə arasında daha səmərəli qarşılıqlı fəaliyyətin geişləndirilməsi və gərginliyin aradan qaldırılması üçün bir sıra tədbirlər görülməsi təklif olunur.
Bölmənin digər xəbərləri
