Bakı, 3 mart (AZƏRTAC). Azərbaycan Prezidenti İlham Əliyevin Dağlıq Qarabağ problemi ilə əlaqədar informasiya mübarizəsində daim hücumda olmaq tövsiyəsinə uyğun olaraq, Ermənistan Respublikasının ölkəmizə qarşı yeritdiyi ilhaqçılıq və etnik təmizləmə siyasəti nəticəsində Azərbaycanın üzləşdiyi faciələr barədə obyektiv beynəlxalq ictimai fikrin formalaşdırılması, həqiqətlərin dünyaya çatdırılması istiqamətində təbliğat işi daha da gücləndirilmişdir. İndi düşmənə qarşı informasiya mübarizəsi düşünülmüş, planlı, müvafiq dövlət orqanları ilə əlaqəli şəkildə aparılır, Azərbaycan reallıqlarının beynəlxalq aləmə çatdırılması sahəsində hücum və ardıcıllıq taktikası üzrə uzun müddətə hesablanmış kompleks tədbirlər həyata keçirilir.

Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyasından bildirmişlər ki, qurum əsir və itkin soydaşlarımızın taleyini araşdırmaqla yanaşı, ermənilərin azərbaycanlılara qarşı törətdiyi misli görünməmiş cinayətlər, həm Ermənistan-Azərbaycan, Dağlıq Qarabağ münaqişəsi, həm də bu problemin tarixi, ayrı-ayrı vaxtlarda azərbaycanlılara qarşı həyata keçirilmiş deportasiya siyasəti ilə bağlı faktlar, erməni terrorçularının əsirlikdə saxlanılan azərbaycanlılara verdikləri işgəncələr haqqında kitablar, broşürlər çap etdirir, sənədli video-foto materiallar hazırlayır, onların müxtəlif dillərdə dünyanın bir çox ölkələrində yayılmasını təşkil edir. Eyni zamanda, münaqişənin tarixi və hüquqi aspektləri haqqında kitab və disklərin Azərbaycan Respublikasının dövlət strukturlarına və xaricdəki səfirliklərinə, diaspor təşkilatlarına, tərəfdaş dövlətlərə, tanınmış alim və ictimai-siyasi xadimlərə, konfliktoloqlara göndərilməsi prosesi davam etdirilir.

Bundan başqa, ölkədə və xaricdə fəaliyyət göstərən kütləvi informasiya vasitələrində, Dövlət Komissiyasının rəsmi saytında müntəzəm olaraq Komissiyanın fəaliyyəti barədə məlumatlar yayılmış, görülmüş işlər barədə müsahibələr verilmiş, məqalələr dərc olunmuş, soyqırımI, etnik təmizləmə, vandalizm, əsir, girov və itkinlərlə bağlı həqiqətlərin ictimaiyyətə çatdırılması istiqamətində məqsədyönlü fəaliyyət göstərilmişdir. İnternet şəbəkəsindən istifadə edilərək beynəlxalq təşkilatlar və informasiya agentlikləri ilə müntəzəm yazışmalar aparılmış, müvafiq materiallar, o cümlədən video və fotofaktlar göndərilmişdir.

Ermənistanın Azərbaycana təcavüzü, bir milyondan artıq azərbaycanlının qaçqın və məcburi köçkün şəraitinə düşməsi, ermənilər tərəfindən törədilmiş terrorçuluq əməlləri və soyqırımı cinayəti barədə həqiqətlərin çatdırılması və insanlığa qarşı cinayət olan Xocalı faciəsinin 18-ci ildönümü ilə əlaqədar “Xocalıya ədalət” kampaniyası çərçivəsində Dövlət Komissiyası Qətər, Küveyt və Birləşmiş Ərəb Əmirliklərində bu ölkələrdəki Azərbaycan səfirlikləri ilə birgə silsilə tədbirlər keçirmişdir.

Azərbaycan Respublikasının Qətər Dövlətindəki səfirliyi ilə Əsir və itkin düşmüş, girov götürülmüş vətəndaşlarla əlaqədar Dövlət Komissiyasının birgə keçirdikləri tədbirdə Azərbaycan icmasının nümayəndələri, bu ölkədə akkreditə olunmuş bir sıra diplomatik nümayəndəliklərin rəhbərləriı, yerli kütləvi informasiya vasitələrinin təmsilçiləri, xarici vətəndaşlar iştirak etmişlər. Səfir Eldar Səlimov ermənilər tərəfindən Azərbaycana qarşı törədilmiş terrorçuluq əməlləri və insanlığa qarşı cinayət olan Xocalı faciəsi barədə tədbir iştirakçılarına ətraflı məlumat vermişdir. Dövlət Komissiyasının katibi Şahin Sayılov çıxış edərək tədbir iştirakçılarına faktlar əsasında ermənilərin xalqımıza qarşı həyata keçirdiyi soyqırımı, etnik təmizləmə, vandalizm, əsir, girov və itkinlərlə bağlı həqiqətləri çatdırmışdır. Sonra Qətərdə ən böyük icma olan Pakistan diasporunun rəhbəri, siyasi tədqiqatçı və yazıçı-publisist Əşrəf Sədiqi çıxış edərək, dost və qardaş Azərbaycan xalqının yaşadığı faciələrdən üzüldüklərini və dövlətinin daim ölkəmizin yanında olduğunu xüsusi qeyd etmişdir.

Tədbir iştirakçılarına Xocalı faciəsini və erməni terrorçuluğunun fəsadlarını əks etdirən sənədli film, kitablar, şəkillər və digər materiallar təqdim olunmuşdur.

Dohada keçirilən tədbirlər çərçivəsində Azərbaycan səfirliyinin köməyi ilə Dövlət Komissiyasının nümayəndə heyəti Qətər Mədəniyyət və İrs Nazirliyinin İctimai Kitabxanalar Departamentinin direktoru Abdulla Naser Alansari ilə görüşmüşdür. Nümayəndə heyəti ən qədim əlyazması 7-ci əsrə aid olan Qətər Mərkəzi Kitabxanasının fəaliyyəti ilə yaxından tanış olmuş və buranın qiraət fonduna daxil edilməsi üçün quruma Azərbaycan Respublikası haqqında çoxlu kitablar hədiyyə etmişdir.

Xocalı faciəsinin ildönümü ilə əlaqədar Azərbaycan Respublikasının Küveyt Dövlətindəki səfirliyi və Dövlət Komissiyası birgə sərgi və təqdimat mərasimi təşkil etmişlər. Tədbirdə Küveytin dövlət təşkilatlarının nümayəndələri, ictimai xadimlər, aparıcı universitetlərinin müəllim-professor heyəti, bu ölkədə akkreditə olunmuş diplomatik korpusun nümayəndələri, Azərbaycan icmasının üzvləri və jurnalistlər iştirak etmişlər.

Səfir Şahin Abdullayev Ermənistanın təcavüzü, bir milyondan artıq azərbaycanlının qaçqın və məcburi köçkün vəziyyətinə düşməsi, ermənilər tərəfindən Azərbaycana qarşı törədilmiş terrorçuluq əməlləri və insanlığa qarşı cinayət olan Xocalı faciəsi barədə tədbir iştirakçılarına ətraflı məlumat vermiş, “Xocalıya ədalət” kampaniyası çərçivəsində il ərzində silsilə tədbirlərin davam etdiriləcəyini bildirmişdir.

Dövlət Komissiyasının katibi Şahin Sayılov çıxışında Ermənistanın azərbaycanlılara qarşı etnik təmizləmə və soyqırımı siyasəti, Azərbaycana qarşı təcavüzü nəticəsində ölkəmizə dəymiş maddi-mənəvi zərər və mədəniyyət abidələrinin dağıdılması, beynəlxalq hüquq normalarına zidd olaraq əsir və girov götürülmüş Azərbaycan vətəndaşlarına qarşı törədilmiş cinayətlər haqqında geniş məlumat vermiş, ölkəmizin hüquq mühafizə orqanlarının əməliyyat-istintaq materialları əsasında Xocalı faciəsini törədən konkret şəxslər və onların cinayət əməlləri, öldürülmüş, işgəncələrə məruz qalmış, əsir və girov götürülmüş Azərbaycan vətəndaşları barədə faktları təqdim etmişdir.

Tədbir iştirakçılarına Xocalı faciəsini və erməni terrorçuluğunun fəsadlarını əks etdirən sənədli film, kitablar, şəkillər və digər əyani vasitələr, “Xocalı uşaqların gözü ilə” şəkil sərgisi nümayiş etdirilmişdir. Tədbir Küveytin “Kuwait I” və “Əl-Vətən” telekanalları, “Əl-Ray”, “Ən-Nahar”, “Al-Qabas” və “Arab Times” qəzetləri tərəfindən geniş işıqlandırılmışdır.

Xocalı faciəsinin ildönümü ilə əlaqədar Azərbaycan Respublikasının Birləşmiş Ərəb Əmirliklərindəki səfirliyi Dövlət Komissiyası ilə birgə anma mərasimi təşkil etmişdir. Tədbirdə ictimai xadimlər, Birləşmiş Ərəb Əmirliklərinin aparıcı universitetlərində təhsil alan azərbaycanlı tələbələr, Azərbaycan icmasının üzvləri və yerli nüfuzlu kütləvi informasiya vasitələrinin nümayəndələri iştirak etmişlər.

Səfir Elxan Qəhrəmanov Ermənistanın yeritdiyi işğalçılıq siyasəti, soydaşlarımıza qarşı törədilmiş terrorçuluq əməlləri və Xocalı faciəsi barədə tədbir iştirakçılarına ətraflı məlumat vermişdir.

Dövlət Komissiyasının katibi Şahin Sayılov çıxışında Ermənistanın azərbaycanlılara qarşı etnik təmizləmə və soyqırımı siyasəti, təcavüzü nəticəsində ölkəmizə dəymiş maddi-mənəvi zərər və mədəniyyət abidələrinin dağıdılması, beynəlxalq hüquq normalarına zidd olaraq əsir və girov götürülmüş Azərbaycan vətəndaşlarına qarşı törədilmiş cinayətlər haqqında geniş məlumat vermişdir.

Tədbir iştirakçılarına erməni qəsbkarlığının fəsadlarını əks etdirən sənədli film, kitablar, şəkillər və digər əyani vasitələr nümayiş etdirilmiş, Xocalı faciəsi barədə fotosərgi təşkil olunmuşdur. Mərasimdə Birləşmiş Ərəb Əmirliklərinin müxtəlif kütləvi informasiya vasitələrinin, o cümlədən tanınmış “The National”, “Aviamost”, “Awraq Publishing” və s. qəzet və jurnallarının nümayəndələri iştirak etmişlər.

######