Bakı, 12 fevral (AZƏRTAC). Fevralın 12-də Dövlət Sosial Müdafiə Fondunda (DSMF) ötən ilin yekunlarına və cari ildə qarşıda duran vəzifələrə həsr olunmuş kollegiya iclası keçirilmişdir.

Dövlət Sosial Müdafiə Fondunun sədri Səlim Müslümov bildirmişdir ki, ötən il Prezident İlham Əliyevin rəhbərliyi ilə ölkəmizdə pensiyaçıların sosial müdafiəsinin gücləndirilməsi ilə yanaşı, pensiya islahatlarının təmin edilməsi siyasəti uğurla gerçəkləşdirilmişdir. Nəticədə böhranlı ildə də pensiya proqramlarının vaxtında və tam icra edilməsi mümkün olmuşdur.

Onun sözlərinə görə, DSMF-nin gəlir və xərcləri üzrə proqnozların icrasının təmin olunması, sığorta-pensiya sisteminin inkişaf etdirilməsi və əmək pensiyaçılarının sosial müdafiəsinin gücləndirilməsi 2009-cu ildə qurumun fəaliyyətinin əsas istiqamətlərini təşkil etmişdir. Ötən il DSMF-nin gəlirləri 1 milyard 600 milyon manat təşkil etmişdir. Bu da 2008-ci ilə nisbətən 205 milyon manat və ya 14,7 faiz çoxdur. 2009-cu ildə məcburi dövlət sosial sığorta haqları üzrə daxilolmalar 2008-ci ilə nisbətən 8,3 faiz və ya 79,4 milyon manat artaraq 1 milyard 37 milyon manat təşkil etmişdir.

Hesabat dövründə həm fiziki şəxslərin, həm də torpaq mülkiyyətçilərinin sosial sığortaya cəlb edilməsi istiqamətində də iş gücləndirilmişdir. Nəticədə fiziki şəxslərdən daxilolmalar 25 faiz, torpaq mülkiyyətçiləri üzrə isə 23 faiz artmışdır.

S.Müslümov demişdir ki, daxilolmaların səviyyəsi pensiya və müavinətlərin vaxtında maliyyələşdirilməsinə imkan vermişdir. 2009-cu ildə DSMF-nin xərcləri 1 milyard 675 milyon manat olmuşdur. Hesabat dövründə fond tərəfindən pensiya və müavinətlərin maliyyələşdirilməsinə 1 milyard 617,6 milyon manat vəsait yönəldilmişdir. Bu da əvvəlki ilə nisbətən 278 milyon manat və ya 20,8 faiz çoxdur. Pensiya xərcləri 2008-ci ilə nisbətən 20,7 faiz və ya 269,1 milyon manat artaraq 1 milyard 571,2 milyon manat təşkil etmişdir.

Hesabat ilində əhaliyə 46,4 milyon manat məbləğində müavinət ödənilmişdir.

Fondun sədri bildirmişdir ki, ölkə üzrə əmək pensiyaçılarının sayı ilkin məlumatlara görə, 2009-cu ilin əvvəlinə 1 milyon 275 min 138 nəfər olmuş və il ərzində 33 min 294 nəfər artaraq ilin sonuna 1 milyon 308 min 432 nəfər təşkil etmişdır.

Ötən il sığortaolunanların fərdi uçot sisteminin qurulması prosesi davam etdirilmişdir. Fərdi uçota alınanların sayı ilin əvvəlinə nisbətən 154 min nəfər artmışdır.

S.Müslümovun verdiyi məlumata görə, DSMF-nin maddi-texniki bazasının təkmilləşdirilməsi istiqamətində işlər davam etdirilmişdir. İl ərzində fondun 9 yerli şöbəsinin yeni inzibati binasının tikintisi başa çatdırılmış, o cümlədən 4-nün inzibati binası istifadəyə verilmişdir. Fond sistemində dövlət qulluqçularının peşəkarlığının artırılması ilə bağlı kadr işinin təşkilinin təkmilləşdirilməsi məqsədi ilə kadrların ixtisas səviyyəsinin təkmilləşdirilməsi kurslarının planı təsdiq edilərək icra olunmuşdur. Vətəndaşların informasiya ilə təmin olunması və məlumatlandırılması məqsədi ilə geniş təbliğat işləri aparılmışdır.

Cari ildə qarşıda duran vəzifələrdən danışan S.Müslümov diqqətə çatdırmışdır ki, “2009-2015-ci illərdə Azərbaycan Respublikasında sığorta-pensiya sisteminin inkişafına dair Dövlət Proqramı” ilə müəyyən edilən islahatlar davam etdiriləcəkdir. Bununla bağlı tədbirlər planının hazırlandığını bildirən sədr demişdir ki, cari ildə islahatların davamı olaraq pensiya təyinatının avtomatlaşdırılması, bu sahədə daxili nəzarətin ictimai nəzarətlə əvəz olunması və insan amilinin rolunun minimuma endirilməsi proseslərinin reallaşdırılması işi intensivləşdiriləcəkdir. 2010-cu ildə bu məsələnin gerçəkləşdirilməsi nəticəsində sığorta-pensiya sisteminin ümumi iqtisadiyyatla əlaqəli inkişafının tam təmin olunması mexanizmi yaradılacaqdır. Hər bir şəxsin əmək fəaliyyətinə başladığı dövrdən etibarən öz fərdi hesabında gələcək pensiyası üçün nə qədər vəsait topladığı onun daimi nəzarətinə veriləcəkdir.

Başqa sözlə, fondda qeydiyyatda olan hər bir şəxs DSMF-nin veb-saytında sosial sığorta nömrəsini daxil edərək, fərdi hesabında toplanmış məbləği və bu məbləğin hansı mənbələrdən formalaşdığını görə biləcəkdir.

Kollegiya iclasında, həmçinin DSMF-nin yerli orqanlarının 2009-cu ildəki fəaliyyəti ətraflı təhlil olunmuşdur. 2010-cu ildə məcburi dövlət sosial sığorta haqlarının toplanılması istiqamətində işlərin gücləndirilməsi, özəl sektorda çalışanların tam qeydiyyatı və əməkhaqlarının leqallaşdırılması ilə bağlı müvafiq qurumlarla birgə addımların atılması barədə qərar qəbul olunmuşdur.