DÖVLƏTQAÇQINKOMUN MƏTBUAT XİDMƏTİNİN BƏYANATI
Avqustun 5-də Mətbuat Klubunda qondarma “Azərbaycan Məcburi Köçkünlər Birliyi”nin yaradılması məqsədi ilə keçirilmiş mətbuat konfransı ilə əlaqədar Dövlətqaçqınkomun Mətbuat Xidməti bildirir ki, son zamanlar ölkədə gərgin zəhmət, ağır sınaqlar bahasına yaradılmış siyasi sabitliyi pozmağa çalışan müxalif qüvvələrin Azərbaycanın beynəlxalq aləmdə qazandığı uğurlara qısqanclıqla yanaşması, şəxsi maraqlarını ölkənin və xalqın maraqlarından üstün tutan həmin qüvvələrin heç bir hüquqi və maddi bazası, hüquqi ünvanı və qeydiyyatı olmayan bu cür qondarma təşkilat və birliklər yaratmağa cəhd göstərməsi, habelə bu barədə KİV-də məlumatların yayımlanması təbii ki, geniş ictimaiyyətlə yanaşı, məcburi köçkünlər tərəfindən də narazılıqla qarşılanmışdır.
Bir neçə vəzifə düşkünü öz ətrafında toplayan müxalif qüvvələr xalqın və dövlətin mənafeyinə zidd olan məkrli siyasətlərinin uğursuzluqla nəticələndiyinə əmin olduğunu biləndən sonra xalqımızın ən həssas təbəqəsi olan qaçqın və məcburi köçkünlərin hissləri ilə oynamağa, daha doğrusu, alver etməyə başlayıblar.
Lakin onlar bir şeydə yanılırlar ki, on il çadır şəhərciklərində, fin qəsəbələrində, vaqon evlərdə, daxmalarda dözülməz həyat şəraitində yaşayan insanların iradəsinə özlərinin bu cür ucuz və sensasiyalı təbliğatları ilə təsir göstərə bilməyəcəklər. Məcburi köçkünlərdən sosial və maddi baza yaratmağa çalışanların yalan və uydurma “birlikləri” yalnız onların öz şəxsi mənafeləri üçündür.
Məcburi köçkünlərin vəziyyətindən “ürək yanğısı” ilə danışaraq, canfəşanlıq edərək öz şəxsi mənafeləriniz məqsədi ilə onların adına aldıqlarınız qrant və digər maliyyə vəsaitlərinə məcburi köçkünlərin heç bir ehtiyacı yoxdur. Çünki həmişə olduğu kimi, Azərbaycan dövləti məcburi köçkünlərin həyat tərzinin yaxşılaşdırılması, sosial məişət problemlərinin həlli, ərzaq təminatı ilə bağlı bütün imkanlarından maksimum istifadə edir.
Təkcə onu qeyd etmək kifayətdir ki, ölkəmizin Prezidenti cənab Heydər Əliyevin qaçqın və məcburi köçkünlərin mənzil-məişət şəraitinin yaxşılaşdırılması məqsədi ilə son bir il ərzində imzaladığı üç fərmanla Dövlət Neft Fondundan 359 milyard manat vəsait ayrılmış və respublikanın 30-dan çox şəhər və rayonlarında yeni qəsəbələrin salınması vüsət halını almışdır. Bakı, Abşeron, Sumqayıt istisna olmaqla, respublikanın bütün şəhər və rayonlarında məskunlaşmış məcburi köçkünlər hər ay ərzaqla təmin olunurlar.
Mətbuat konfransında heç bir statistik məlumata əsaslanmayaraq, 230 min məcburi köçkünün dünyasını dəyişməsini “ürək yanğısı” ilə hallandıran cənab Kərim Kərimlinin bu birliyi yaratdıqdan sonra alacağı qrantdan köçkünlərə pay verərək guya təbii ölümün qarşısını alacağı təəccüb doğurur.
Konfransda deyilmişdir ki, qondarma birlik guya məcburi köçkünlərin bir növ əlaqələndirmə mərkəzi rolunu oynamağa çalışacaqdır.
Məlumat üçün bildiririk ki, respublikamızın ərazisində məskunlaşmış qaçqın və məcburi köçkünlərin bütün problemlərini həll edən və koordinasiya edən Dövlət Komitəsi və Beynəlxalq Humanitar Yardım təşkilatlarının ölkəmizdəki fəaliyyətinin əlaqələndirilməsi ilə məşğul olan respublika komissiyası vardır.
Məcburi köçkünlər üçün qondarma birliyi yaradanların məcburi köçkünlər adından danışmağa heç bir mənəvi haqqı yoxdur. Hər şeydən əvvəl ona görə ki, bu soydaşlarımızın problemləri ilə birbaşa dövlət özü məşğul olur.
Bütün bunları nəzərə alaraq, Dövlətqaçqınkomun Mətbuat Xidməti bir daha bildirir ki, 5-10 nəfər qohum-qonşusunu başına toplayıb, səviyyə və qabiliyyətlərindən yuxarı iddialarda olanlar bilməlidirlər ki, qaçqın və məcburi köçkün soydaşlarımızın sosial vəziyyətinin yaxşılaşdırılması məsələsi ölkəmizin Prezidenti cənab Heydər Əliyevin ən əsas problemi kimi gündəlik diqqət mərkəzindədir.
Məcburi köçkünlərin uzun müddət dözülməz şəraitdə yaşamaları, onların Azərbaycan Prezidenti cənab Heydər Əliyevə olan inamlarından irəli gəlir. Məcburi köçkünlər əmindirlər ki, möhtərəm Prezident işğal olunmuş torpaqlarımızın istənilən yolla azad edilməsinə nail olacaq və bu insanlar doğma yurdlarına qayıdacaqlar.
Bölmənin digər xəbərləri
