İQTİSADİYYAT
Dünya Su Forumu çərçivəsində keçirilən sərgilərdə Azərbaycanın su təchizatı barədə məlumat verilib
![](/files/galleryphoto/2022/1/1200x630/16484800739854983_1200x630.jpeg)
![](/files/galleryphoto/2022/1/1200x630/164848007338384138_1200x630.jpeg)
Bakı, 28 mart, AZƏRTAC
Martın 20-26-da Seneqalın paytaxtı Dakar şəhərində 9-cu Dünya Su Forumu və Dünya Su Şurasının İdarə Heyətinin 77-ci görüşü keçirilib. “Sülh və inkişaf üçün su təhlükəsizliyi” mövzusunda keçirilən 9-cu Dünya Su Forumunun açılışında Seneqal Respublikasının Prezidenti Makki Sal, 7 ölkənin dövlət və hökumət başçıları çıxış ediblər. Foruma BMT Baş Assambleyasının, UNESCO-nun, Dünya Bankının, Afrika İnkişaf Bankının, Dünya Su Şurasının, Avropa Komissiyasının, BMT-nin Ətraf mühit proqramının rəhbərləri və 100-dək ölkədən 30 mindən çox nümayəndə qatılıb.
“Azərsu” ASC-dən AZƏRTAC-a bildirilib ki, forumun bölmə iclaslarında su ehtiyatlarının idarə edilməsi, mühafizəsi, tullantı sularının təmizlənməsi və təkrar istifadəsi, qlobal iqlim dəyişiklikləri şəraitində adaptasiya metodları, elmi-tədqiqat və təhsil məsələləri müzakirə olunub.
Forum çərçivəsində keçirilən sərgilərdə Azərbaycan nümayəndə heyəti müxtəlif şirkətlərin təmsilçiləri ilə işgüzar görüşlər keçirib. Görüşlərdə Azərbaycanda su təchizatı sahəsində görülmüş işlər, Sərsəng su anbarı, qaçqın və məcburi köçkünlərin su problemləri haqqında məlumatlar verilib.
Forumun yekun iclasında Dakar Bəyannaməsi qəbul olunub.
Dünya Su Şurasının İdarə Heyətinin iclasında Şuranın növbəti 3 illik Fəaliyyət Planı, 8-ci Dünya Su Forumunun son hesabatları, 9-cu Dünya Su Forumuna hazırlıq işləri və 10-cu Dünya Su Forumuna ev sahibliyi, eləcə də yeni üzvlərin qəbul olunması və digər məsələlər müzakirə edilib. İclasda 10-cu Dünya Su Forumuna İndoneziyanın ev sahibliyi təsdiqlənib.
“Azərsu” ASC-nin Mərkəzi Laboratoriyasının müdiri Elçin Əliyev İdarə Heyətinə yeni alternativ üzv seçilib.
Səfər müddətində “Azərsu” ASC-nin nümayəndələri tədbir çərçivəsində bir sıra ölkələrin və beynəlxalq təşkilatların təmsilçiləri ilə görüşüb, əməkdaşlıq məsələlərini müzakirə ediblər. Dünya Su Şurasının prezidenti Lui Fuşon, Beynəlxalq Su Resursları Assosiasiyasının icraçı direktoru Kallum Klenç, Türkiyə Su İnstitutunun prezidenti Ahmet Saatçı, BMT-nin Su proqramının və BMT-nin Ərzaq və Kənd Təsərrüfatı təşkilatının məsul şəxsləri, bir sıra şirkətlərin rəhbərləri və nümayəndələri ilə keçirilən görüşlərdə qarşılıqlı maraq doğuran məsələlər ətrafında fikir mübadiləsi aparılıb.