İDMAN
Əcnəbi atletlər ilk Avropa Oyunlarını mühüm idman hadisəsi kimi qiymətləndiriblər
![](/files/galleryphoto/2015/2/1200x630/1434044607147394099_1200x630.jpg)
![](/files/galleryphoto/2015/2/1200x630/14340446076510815422_1200x630.jpg)
![](/files/galleryphoto/2015/2/1200x630/14340446076537911240_1200x630.jpg)
Bakı, 11 iyun, AZƏRTAC
Birinci Avropa Oyunlarında iştirak edəcək əcnəbi idmançılar yarışların əhəmiyyəti haqda fikirlərini bölüşüblər.
AZƏRTAC xəbər verir ki, atletika üzrə britaniyalı dünya çempionu Aylin Rid ilk Avropa Oyunlarında iştirak etməkdən məmnunluğunu bildirərək deyib: “İlk Avropa Oyunlarının çox maraqlı və heyrətamiz idman hadisəsi olacağına əminəm. Çox şadam ki, Bakıda bu heyrətamiz Oyunlarda iştirak edəcəyəm”.
Almaniyanın artıq Bakıda olan kişilərdən ibarət çimərlik voleybolu komandasının üzvü Lukas Kampa da birinci Avropa Oyunlarını mötəbər idman tədbiri kimi qiymətləndirərək deyib: “Hər şey çox mükəmməldir. Oyunların maraqlı və əla olacağına ümid edirəm. Bakıda gördüklərim çox gözəldir”.
Fransanın voleybol komandasının üzvü Baptiste Geiler Bakıda qalib gəlmək üçün əlindən gələni edəcəyini vurğulayaraq bildirib: “İlk Avropa Oyunlarında medal qazanmaq istəyirik. Bu Oyunlar Avropa Olimpiadasıdır. Hesab edirəm ki, bu, böyük təcrübə olacaq”.
Almaniyanın kişilərdən ibarət voleybol komandasının məşqçisi Vital Heynen də birinci Avropa Oyunlarını əhəmiyyətli idman tədbiri adlandırıb: “İlk Avropa Oyunları Olimpiya Oyunları səviyyəsində olan bir tədbirdir və qitənin idman tarixində böyük əhəmiyyət kəsb edir”.
Sinxron üzgüçülük yarışında Böyük Britaniyanı təmsil edəcək Cenevieve Rendal Bakıda keçiriləcək ilk Avropa Oyunlarında mübarizə aparmağı səbirsizliklə gözlədiyini deyib: “Doğrudan da Bakıda mübarizə aparmağı səbirsizliklə gözləyirəm. Belə bir mötəbər idman tədbirində iştirak etməkdən məmnunam. Bu, mənim üçün həqiqətən də yeni təcrübə olacaq. Finala çıxmaq üçün böyük səy göstərəcəyik”.
Britaniyalı digər atlet, suya tullanma yarışında çıxış edəcək Milli Fauler ilk Avropa Oyunlarını böyük hadisə adlandıraraq deyib: “Bu, beynəlxalq səviyyədə gördüyüm ən böyük hadisədir. Bizim komandamız çox güclüdür. Ötən il və bu il çox yaxşı çıxış etdik. Düşünürəm ki, Bakıda da uğur bizimlə olacaq”.
Suya tullanma üzrə daha bir britaniyalı atlet Matti Li Avropa Oyunlarının beynəlxalq nüfuza malik olduğunu diqqətə çatdırıb: “Mən Bakıda çıxış edən milli komandamızın tərkibində olmaqdan çox məmnunam. Bu, Avropanın tarixində ilk Oyunlar olacaq. Bu çoxnövlü idman yarışında iştirak etmək karyeram üçün çox vacibdir”.