ƏGƏR 115 İL ÖMÜR SÜRMƏK İSTƏYİRSİNİZSƏ....
AZƏRTAC xarici KİV-lərə istinadla xəbər verir ki, dünyada ən ahıl xanım olan Edna Parker 115-ci doğum gününü qeyd etmişdir. Alimlər ümid edirlər ki, Edna nənə və yaşı yüzü ötmüş digər nənə və babalar, nəhayət ki, uzunömürlü olmağın sirrini açmağı kömək edəcəklər.
Edna nənənin 59 yaşlı nəvəsi Don Parker demişdir: “Biz bunun səbəbini bilmirik. Bu, bəlkə də onun heç vaxt əsəbiləşməməsindən, özünü yaxşı formada saxlamasından, qamətini dik tutmasından irəli gəlir”.
Boston Universitetində uzunömürlülük fenomeni ilə məşğul olan tədqiqatçılar iki il əvvəl Edna nənədən xüsusi məlumat bazası üçün qan analizi götürmüşlər. Həmin məlumat bazasında 110 yaşı ötmüş uzunömürlülərin DNT-si haqqında məlumat vardır. Uzunömürlülüyün səbəblərini aydınlaşdırmaq üçün onların genləri tədqiq olunur.
ABŞ-ın Kaliforniya ştatında yerləşən Herontoloji Tədqiqat Mərkəzinin məlumatına görə, dünyada yaşı 110-dan yuxarı olan cəmi 64 qadın və 11 kişi vardır. 1893-cü il aprelin 28-də doğulmuş Edna Parker ondan cəmi bir neçə ay böyük olan yapon xanım ötən ilin avqustunda vəfat etdikdən sonra dünyanın ən ahıl qadını sayılmışdır.
Alimlər uzunömürlü qadınlarda eyni genetik mutasiya aşkar etmişlər. Bu mutasiyalar, heç şübhəsiz, qocalma prosesinin ləngiməsində və orqanizmin qocalıqla bağlı xəstəliklərə müqavimət göstərməyində böyük rol oynaya bilər. Alimlərin fikrincə, uzunömürlülüyün sirri genetik amillər, həmçinin insanın həyat tərzi ilə bağlanır. Stresə qarşı davamlı olmaq, fikri ayrı səmtə yönəltmək qabiliyyəti burada heç də sonuncu rol oynamır.
Tədqiqatın nəticələri bu gün qətiyyətlə deməyə imkan verir: uzunömürlülər əsəbiləşmirlər.
