Elçin Mirzəbəyli: Biz müstəqilliyimizə doğru uzun illər boyu addım-addım irəliləmişik
Bakı, 18 oktyabr, AZƏRTAC
Azərbaycanlılar tarixdə böyük və qüdrətli dövlətlərin qurucuları kimi, hər zaman azad, müstəqil və öz bayrağının kölgəsində yaşamaq arzusunda olublar. Hətta ən çətin dövrlərdə, istila və istibdad altında, ayrı-ayrı imperiyaların tərkibində olanda azadlıq və müstəqillik məfkurəsi xalqımızın genetik yaddaşını tərk etməyib. Azərbaycan xalqının onillər, bəlkə də yüzillər irəlini görməyi bacaran düşünən beyinləri ən ağır şərtlər altında belə xalqımızın azad, müstəqil və firavan yaşaması üçün fədakarlıq nümayiş etdirmiş, öz ideyaları və əməlləri ilə bu günümüzə körpü salmışlar.
Ümummilli lider Heydər Əliyevin hakimiyyətə gəldiyi ilk günlərdən o zaman SSRİ-nin tərkibində müttəfiq respublikalardan biri olan Azərbaycanın həyatında baş verən dəyişikliklərə, iqtisadiyyatdan mədəniyyətə, enerji sektorundan hərbi sahəyə qədər görülən bütün işlərə bu günün azad insanının baxış bucağından nəzər salsaq, hər şeyin xalqımızın azad və müstəqil yaşamasına xidmət etdiyini görə bilərik.
Bu fikirləri AZƏRTAC-a açıqlamasında "Xalq cəbhəsi" qəzetinin baş redaktoru, siyasi ekspert Elçin Mirzəbəyli bildirib.
Onun sözlərinə görə, SSRİ-nin siyasi-ideoloji sisteminin nə qədər əzici və qəddar olduğunu bilən və həmin dövrün kataklizmlərindən keçən insanlar, 70-ci illərdə Azərbaycan xalqının öz tarixi köklərinə qayıtmasına xidmət edən siyasət yürüdülməsinin nə qədər çətin olduğunu yaxşı anlayırlar. Heydər Əliyevin SSRİ-dəki xalqların çoxmədəniyyətliliyi, bütövlükdə mədəniyyət çətiri altında həyata keçirdiyi milli inkişaf siyasətinin nə qədər dəqiq düşünülmüş bir strategiya olduğunu da həmçinin yaxşı başa düşürlər.
Heydər Əliyevin hakimiyyətə gəlişindən sonra Azərbaycan ədəbiyyatına münasibətdə bütöv bir yanaşma ortaya qoyuldu. Dünyanın müxtəlif ölkələrində, öz tarixi vətənlərində yaşayan azərbaycanlıların əsərləri dərindən araşdırıldı, ədəbi bağların bərpa edilməsi istiqamətində mühüm addımlar atıldı.
“Həmin dövrdə qısa bir zaman kəsiyində ölkəmizdə çəkilən filmlərin bir hissəsinin siyahısına nəzər salmaq və xalqımızın tarixi, mədəniyyəti, milli dünyagörüşü ilə bağlı bu filmlərdə verilən mesajları xatırlamaq 13 illik zaman kəsiyində Ulu Öndərin həyata keçirdiyi milli siyasətin mahiyyətini anlamaq üçün yetərlidir: "Yeddi oğul istərəm", "Üzeyir ömrü", "Tütək səsi", "Şərikli çörək", "Qorxma, mən səninləyəm", "Qatır Məmməd", "Bizim Cəbiş müəllim", "İstintaq", "Gün keçdi", "Dərviş Parisi partladır", "Bir cənub şəhərində", "Dəli Kür", "Babək", "Dədə Qorqud", "Axırıncı aşırım". Məsələn, ilk baxışda "Qatır Məmməd" filmi sovet ideologiyasına xidmət edir. Amma bu filmdə Azərbaycan Xalq Cümhuriyyətindən bəhs edilməsi və Cümhuriyyət ordusunu təmsil edən zabitin bütün yayındırıcı neqativ məqamlara baxmayaraq, insanlarda müsbət hisslər yaratması, düşünürəm ki, həmin dövr üçün olduqca böyük addım idi. Müharibə mövzusunda çəkilən “Tütək səsi", "Şərikli çörək", "Bizim Cəbiş müəllim" kimi filmlərdə xalqımızın milli ruhu, mərdliyi, humanizmi əks olunmaqla yanaşı, Azərbaycana "əyalət respublikası" kimi yanaşmalara qarşı ölkəmizin faşizm üzərindəki qələbədə oynadığı müstəsna rol xatırladılırdı.
SSRİ-nin süqutuna qısa bir müddət qalmış, öncə Qarabağın Azərbaycandan qopardılmasına qarşı başlayan etirazların, daha sonra isə müstəqillik hərəkatının iştirakçıları həmin dövrdə yaranan ədəbiyyat nümunələrinin, filmlərin təsiri altında formalaşmışdılar. Bəziləri bunu dərk etmək istəməsələr də, amma göz önündə olan faktlar Heydər Əliyevin hakimiyyətə gəldiyi ilk günlərdən Azərbaycan xalqını müstəqil yaşamağa hazırladığı təkzibolunmaz reallıqdır", -deyə E.Mirzəbəyli vurğulayıb.
Siyasi ekspert bildirib ki, bu sıraya Azərbaycan dilinin inkişafı, tariximizin öyrənilməsi, hərb sahəsi başda olmaqla, bütün sahələr üzrə milli kadrların hazırlanması istiqamətində atılan ardıcıl addımları da əlavə etsək, Heydər Əliyevin işıqlı zəkasının illərin arxasından necə boy göstərdiyini görə bilərik.
Sovet dönəmində azərbaycanlıları mümkün qədər hərb sənətindən kənarda saxlamağa çalışırdılar. Ola bilsin ki, o dövrdə mərkəz Azərbaycan türklərinin tarixdə dəfələrlə dövlətlər, imperiyalar qurduğu faktlarına istinad edərək bu addımı atırdı. Hətta o illərdə hərbi xidmətə çağırılan azərbaycanlıları inşaat dəstələrinə göndərməyə cəhdlər edilirdi. Məqsəd yenə də bizi hərb sənətindən aralı saxlamaq idi. Amma buna baxmayaraq, Heydər Əliyev Azərbaycanda rəhbərliyə gəldikdən sonra hərb sənətinin sirlərinin azərbaycanlılara öyrədilməsi üçün bir neçə addım atıldı. Şübhəsiz ki, bunlardan biri Cəmşid Naxçıvanski adına Hərbi Məktəbin yaradılması oldu. Daha sonra Hərbi Dənizçilik Məktəbi, Quru Qoşunları Ali Məktəbi yaradıldı. Həmin dövrdə azərbaycanlıların bu hərbi məktəblərdə təhsil almaları prioritet hesab edilirdi. Gizli də olsa, bu barədə konkret təlimatlar verilmişdi. Eyni zamanda, bu illərdə azərbaycanlılar SSRİ-nin müxtəlif ali hərbi məktəblərinə təhsil almaq üçün göndərilməyə başlanıldı. Həmin şəxslər sonradan Azərbaycan Ordusunun qurulması prosesində iştirak etdilər.
Bütün bunlar yaxın tarixdə, bir çoxlarımızın gözünün önündə cərəyan edən proseslərdir. Biz müstəqilliyimizə doğru uzun illər boyu addım-addım irəliləmişik. Əsl müstəqillik, azadlıq iti zəka, qətiyyət, cəsarət, Vətənə təmənnasız sevgi və yüksək liderlik keyfiyyətləri tələb edir.
“Müstəqilliyi qorumaq onu əldə etməkdən daha çətindir. Müstəqilliyimizin geridə qalan 31 ili Heydər Əliyevin bu deyiminin nə qədər doğru olduğunu sübuta yetirdi. Biz Ulu Öndərimizin iti zəkası, polad xarakteri və xalqımızın birliyi nəticəsində müstəqilliyimizi qoruduq, ərazi bütövlüyümüzü bərpa etdik. Öz torpağımızda, öz bayrağımız altında qalib xalqın nümayəndələri kimi ömür sürürük. Müstəqil dövləti olan bir xalq üçün bundan böyük ucalıq yoxdur", - deyə Elçin Mirzəbəyli qeyd edib.
Bölmənin digər xəbərləri
