İQTİSADİYYAT
Elektron xidmətlərin tətbiqi vətəndaşlara əmlaklarını daha asan və operativ şəkildə dövlət qeydiyyatından keçirməyə imkan yaradır
Bakı, 13 sentyabr (AZƏRTAC). Əmlak Məsələləri Dövlət Komitəsi daşınmaz əmlaka dair hüquqların dövlət qeydiyyatı sisteminin müasir standartlara uyğun təkmilləşdirilməsi, bu sahədə vətəndaşlara, biznes qurumlarına daha çevik və şəffaf mexanizmlər əsasında xidmətlərin göstərilməsi, kadrların peşəkarlıq səviyyəsinin daha da artırılması ilə bağlı davamlı tədbirlər həyata keçirir.
Komitənin mətbuat xidmətindən AZƏRTAC-a bildirmişlər ki, bu tədbirlərdən ən mühümü 2012-ci ilin mayından başlanan daşınmaz əmlakın qeydiyyatı sahəsində elektron xidmətlərin tətbiqidir. Bu, əmlak bazarında şəffaflığın daha da yüksəlməsinə, əmlak bazarı iştirakçılarının etimadının artmasına, vətəndaşların əmlaklarını daha rahat və operativ şəkildə dövlət qeydiyyatından keçirmələrinə imkan yaradır. Artıq vətəndaşlar daha asan və rahat şəraitdə vaxtlarına qənaət edərək, istənilən vaxt, heç bir ünvana müraciət etmədən komitənin emdk.gov.az saytında yaradılmış elektron xidmətlər bölməsi vasitəsilə yaşayış evləri üzərində mülkiyyət hüquqlarının dövlət qeydiyyatına alınması barədə çıxarışların verilməsi üçün müraciət edirlər.
Qısa müddətdə komitəyə daşınmaz əmlakla bağlı çıxarışların və arayışların (Forma 1) verilməsi ilə bağlı 200-ə yaxın elektron müraciət daxil olmuşdur. Bu müraciətlər sırasında Bakı şəhəri ilə yanaşı, respublikanın digər regionlardan da müraciətlər mövcuddur. Bu müraciətlərin icrası qanunvericiliyə uyğun olaraq onlayn rejimində təmin edilmişdir.
Komitənin rəsmi internet səhifəsində daşınmaz əmlakın vahid dövlət kadastrı ilə bağlı xidmətlər, dövlət əmlakı üzrə icarə haqlarının ödənişi, dövlət əmlakının qorunub saxlanılması və ondan istifadə vəziyyəti haqqında illik xüsusi hesabatların qəbulu, vətəndaşların elektron müraciətlərini əhatə edən elektron xidmət fəaliyyət göstərir. Bu bölmədə elektron xidmətlərin göstərilməsi qaydaları, əmlak qeydiyyatı və hərraclarda iştirak üçün müraciət (ərizə) formaları, tələb olunan sənədlərin siyahısı, dövlət rüsumu və xidmət haqları, bir sözlə, elektron xidmətlərdən istifadə etmək üçün tələb olunan bütün məlumatlar yerləşdirilmişdir.