İQTİSADİYYAT
Əmək və Əhalinin Sosial Müdafiəsi Nazirliyində kollegiya iclası keçirilmişdir
Bakı, 6 avqust (AZƏRTAC). Avqustun 6-da Əmək və Əhalinin Sosial Müdafiəsi Nazirliyində cari ilin birinci yarısında görülən işlərin və qarşıda duran vəzifələrin müzakirəsinə həsr olunmuş kollegiya iclası keçirilmişdir.
Nazirliyin ictimaiyyətlə əlaqələr şöbəsindən AZƏRTAC-a bildirmişlər ki, iclası açan nazir Füzuli Ələkbərov ölkədə iqtisadi artımın sosial sahədə də müsbət göstəricilərin davamlı şəkildə yüksəlməsi ilə müşayiət olunduğunu demişdir.
Bildirilmişdir ki, cari ilin altı ayında əhalinin pul gəlirləri 2 faizlik inflyasiya göstəricisini 5,1 faiz üstələyərək 7,1 faiz artmış, eyni zamanda 45 mini daimi olmaqla 55 min yeni iş yeri açılmışdır. Bu il iyulun 1-nə respublikada 531 min 885 nəfəri əhatə edən 120 min 904 ailənin hər birinə ayda orta hesabla təxminən 120 manat olmaqla ünvanlı yardım verilir. Ehtiyac meyarının məbləği isə 2006-cı ildəki 30 manatla müqayisədə son 6 ildə təxminən 3,1 dəfə artırılaraq 93 manata çatdırılmışdır.
Qeyd edilmişdir ki, aztəminatlı ailələrin dövlət yardımından asılılığının aradan qaldırılması və sosial reabilitasiyası məqsədi ilə hazırlanaraq iki il öncə sınaq işlərinə başlanılan “Özünədəstək” proqramı artıq öz müsbət nəticələrini verir. Belə ki, 13 rayon və şəhər üzrə proqrama cəlb olunmuş 271 ailədən 111 ailə üzrə proqram başa çatmış və cari ilin ilk rübündə aparılan monitorinq nəticəsində onlardan böyük əksəriyyətinin gəlirlərində mütəmadi artım dinamikası müşahidə edilmişdir.
Vurğulanmışdır ki, nazirlikdə yaradılan, ixtisaslaşmış vətəndaş cəmiyyəti institutlarının təmsil olunduğu İctimai Şura cari ilin birinci yarısında da yeni sosial proqramların icrası, sosial qanunvericiliyin təkmilləşdirilməsi üçün təkliflərin hazırlanması işlərində fəal iştirak etmişdir.
Diqqətə çatdırılmışdır ki, hazırda əlil və şəhid ailələri üçün Bərdə, Şamaxı, Xaçmaz, Qax rayonlarında 4 mərtəbəli 36 mənzilli, Goranboy, Tərtər, Ağdam, İmişli, Beyləqan rayonlarında 6 mərtəbəli 54 mənzilli və Bakının Nizami rayonunda 1 ədəd 12 mərtəbəli 96 mənzilli binaların tikintisi işləri aparılır. Bakının Nərimanov rayonunda isə gözdən əlillər üçün 12 mərtəbəli 132 mənzilli bina inşa edilməkdədir. 1998-ci ildən 2012-ci ilin dekabr ayınadək respublikamıza əlillər üçün cəmi 3 min 526 ədəd avtomobil alınıb gətirilmiş və imtiyazlı əlillər arasında paylanmışdır. Bu istiqamətdə işlər cari ildə də davam etdiriləcəkdir.
Yaşadıqları bölgələrdə vətəndaşların qəbulu, müraciətlərinin özlərinin iştirakı ilə araşdırılması nazirliyin fəaliyyətində əsas istiqamətlərdən biridir. Ötən dövrdə F.Ələkbərov tərəfindən nazirlikdə və rayonlarda 13 vətəndaş qəbulu keçirilmiş, 500 nəfərdən artıq vətəndaş fərdi qaydada qəbul edilərək müraciətləri dinlənilmiş, müraciətlərlə bağlı konkret tədbirlər görülmüşdür. Vətəndaşların qəbulu zamanı müraciətlərin araşdırılması ilə yanaşı, aztəminatlı ailələrin gələcəkdə aktiv sosial müdafiə tədbirlərinə cəlb olunmaq üçün malik olduqları potensiallar da ətraflı öyrənilmişdir.
Kollegiya iclasında görülən işlər və qarşıda duran vəzifələr geniş şəkildə müzakirə edilmiş və sonda 2013-cü ilin ikinci yarısı üçün tədbirlər planı təsdiq edilmişdir.