SİYASƏT
Erməni qətnaməsi Kaliforniya ştatı parlamentinin müzakirəsinə çıxarılmayacaqdır
Bakı, 12 aprel (AZƏRTAC). ABŞ-ın Kaliforniya ştatının qanunverici assambleyasının üzvü Bob Blumenfild Azərbaycan-Amerika Şurasına (AAŞ) ünvanlanmış məktubunda məmnunluq hissi ilə bildirmişdir ki, “Sumqayıtda, Bakıda və Kirovabadda qondarma erməni talanlarını pisləyən ziddiyyətli ACR 96 qətnaməsinin layihəsi” assambleyada ümumi səsverməyə çıxarılmayacaqdır.
Ştatın qanunverici orqanının üzvünün məktubunda deyilir ki, o, bu yaxınlarda Azərbaycan diplomatları ilə görüşmüşdür. Görüş əsnasında təklif edilmiş qətnamədəki faktların səhih olmadığı aydınlaşdırılmışdır.
Bundan əvvəl AAŞ assambleya üzvünə məktubla müraciət edərək, ştatın erməni icmasının lobbilik etdiyi qətnamə layihəsində saxtalaşdırılmış elementlər olduğunu göstərmiş və 1914-18-ci illərdə Anadolunun işğal edilmiş hissəsində mülki müsəlman əhalisinə, 1918 və 1987-1994-cü illərdə azərbaycanlılara qarşı ermənilərin özlərinin törətdikləri dəhşətli cinayətləri, o cümlədən Ermənistan tərəfindən Xocalı, Qaradağlı, Malıbəyli, Quşçular, Ağdaban, Şuşa, Bağanis-Ayrım və s. yaşayış məntəqələrində azərbaycanlılara qarşı törədilmiş soyqırımı aktlarını xatırlatmışdır.
AAŞ Sumqayıt talanlarında təxribatçı Eduard Qriqoryanın başçılıq etdiyi quldur dəstəsinin sumqayıtlıların qətlində iştirak etdiyini, qonşu erməniləri öz evlərində gizlədən azərbaycanlıların qəhrəmanlığını, bu iyrənc təxribatın izlərinin Yerevana aparıb-çıxardığını sübuta yetirən aşkar dəlilləri xatırlatmışdır.
“Daşnaksutyun” partiyasının erməniliyin məqsədlərinə nail olunması naminə, sadəlövh Qərbin mərhəmətini qazanmaq məqsədi ilə öz həmvətənlərinin öldürülməsinə icazə verən sənədlərindən, Zori Balayanın erməni mənşəli bakılıların və sumqayıtlıların “miatsum”a qurban verildiyi barədə çıxışlarından, Ermənistanın sabiq prezidenti Robert Koçaryanın “azərbaycanlıların və ermənilərin genetik uyğunsuzluğu” və hazırkı prezident Serj Sarkisyanın Xocalıda stereotiplərinin uğurla qırılması barədə faşist fikirlərindən çoxsaylı sitatlar gətirilmiş, ittifaq prokurorluğunun Eduard Qriqoryanın və bir sıra digər ermənilərin Azərbaycanda öz həmvətənlərinin öldürülməsində iştirakı ilə bağlı cinayət işlərinin materialları təqdim edilmişdir.
AAŞ Amerika qanunvericiləri arasında maarifləndirmə işini bundan sonra da davam etdirmək, onların diqqətini Ermənistanın indiki rejiminin irqçi mahiyyətinə cəlb etmək niyyətindədir.