Fevralın 4-də Beynəlxalq İnsan Qardaşlığı Günü qeyd olunur
Bakı, 4 fevral, AZƏRTAC
2020-ci il fevralın 4-də BMT-nin rəsmi əlamətdar günləri siyahısına daxil edilmiş Beynəlxalq İnsan Qardaşlığı Günü bütün dünyada geniş şəkildə qeyd olunur.
Bu əlamətdar gün 2019-cu il fevralın 4-də Roma Papası Fransisk və Əl-Əzhər Böyük İmamı Şeyx Əhməd Əl-Tayibin Əbu-Dabidə imzaladıqları “Dünyada Sülh və Birgəyaşayış naminə Bəşəriyyətin Qardaşlığı” Bəyannaməsinin ildönümünə həsr olunub. 2020-ci il dekabrın 21-də BMT Baş Assambleyası Birləşmiş Ərəb Əmirlikləri və Misirin birgə təşəbbüsü ilə 4 fevral tarixini Beynəlxalq İnsan Qardaşlığı Günü elan edib.
AZƏRTAC xəbər verir ki, bu münasibətlə BMT-nin Baş katibi Antonio Quterreşin müraciətində deyilir: “Beynəlxalq İnsan Qardaşlığı Günündə biz bərabərlik, birlik və qarşılıqlı hörmət dəyərlərini qeyd edirik. Bununla belə, bu gün bütün dünyada ayrı-seçkiliyin, ksenofobiyanın və dözümsüzlüyün insanları bir-birindən ayırdığını və cəmiyyətləri parçaladığını görürük.
Dini liderlər də daxil olmaqla, bölünmə üzərində dialoq axtarmaq, nifrət ritorikasına son qoymaq hamımızın borcudur. Papa Fransisk və Əl-Əzhərin Böyük İmamı Şeyx Əhməd Əl-Tayibin həmmüəllifləri olduğu “Dünyada Sülh və Birgəyaşayış naminə Bəşəriyyətin Qardaşlığı” Bəyannaməsi dinlərarası harmoniya və dinc yanaşı yaşamaq üçün plandır. Bu, insanların hüquqlarına və ləyaqətinə ümumi öhdəliyimizin hamı üçün daha yaxşı gələcəyin əsasını təşkil etdiyini xatırladan güclü bir amildir. Gəlin, bu Bəyannamədən ilhamlanaraq bir insan ailəsi olduğumuzu anlayaq, müxtəlifliklə zəngin, ləyaqət və hüquqlar baxımından bərabər və həmrəylikdə bir yaşayışı təmin edək. Biz birlikdə bütün insanlar üçün daha dinc, əhatəli və ədalətli dünyaya yol aça bilərik”.
Bölmənin digər xəbərləri
