Gəncə, 18 sentyabr (AZƏRTAC). Gəncədə yeni dərs ilinin ilk günlərində daha iki təhsil ocağı -15 və 43 nömrəli orta məktəblər əsaslı təmirdən sonra istifadəyə verilmişdir.

AZƏRTAC xəbər verir ki, hər iki məktəbin açılış mərasimində iştirak edən Gəncə Şəhər İcra Hakimiyyətinin başçısı Elmar Vəliyev kollektivləri yeni dərs ilinin başlanması münasibətilə təbrik etmiş, dövlətimizin qayğısı sayəsində müasir standartlara uyğun təmir edilən hər iki məktəbin pedaqoji kollektivinə yeni-yeni uğurlar arzulamışdır. Bildirmişdir ki, yeni tədris ilində Gəncədə əsaslı təmir edilmiş 4 orta məktəb binası istifadəyə verilmişdir. Daha 6 binada tamamlanma işləri görülür. Gələn il isə 8 məktəbin əsaslı təmiri nəzərdə tutulmuşdur.

Məktəb kollektivlərinin nümayəndələri çıxış edərək yaradılan şəraitə görə Prezident İlham Əliyevə minnətdarlıqlarını bildirmişlər.

Sonra ən müasir fənn laboratoriyaları, idman zalı, kitabxana, kompyuter otağı ilə təmin edilmiş hər iki məktəbdə rəmzi lent kəsilmiş, mərasim iştirakçıları yaradılan şəraitlə yaxından tanış olmuşlar.