GORANBOYDA TURİZMİN İNKİŞAFI ÜÇÜN TƏDBİRLƏR GÖRÜLÜR
AZƏRTAC xəbər verir ki, iqlimi və füsunkar təbiəti ilə diqqəti cəlb edən, tarixi abidələrlə zəngin Goranboyda turizmin inkişafı üçün son bir ildə xeyli iş görülmüşdür.
Sarov, Bağçakürd, Zeyvə kəndlərində, Qızılhacılı, Dəliməmmədli qəsəbələrində və Goranboy şəhərində olan tarix və memarlıq abidələrində təmir-bərpa işləri aparılmış, bu abidələrin toponimik-arxeoloji bukletləri çap edilmişdir. Aşağı Ağcakənd və Gülüstan əraziləri təbii relyefinə görə turizmin inkişafı üçün əlverişli və iqtisadi potensiala malik ərazilər kimi seçilmiş, burada turizm-istirahət mərkəzi yaradılmışdır. Təkcə keçən il bu mərkəzdə 800 nəfərdən çox turist dincəlmişdir.
Rayon mədəniyyət və turizm şöbəsinin müdiri Gündüz Hacıyev AZƏRTAC-a demişdir ki, turizmin genişləndirilməsi üçün bu günlərdə həmin ərazidə daha 5 istirahət mərkəzi üçün torpaq sahəsi ayrılmış, Mədəniyyət və Turizm Nazirliyinin mütəxəssisləri ilə birgə turizm marşrutu müəyyənləşdirilmişdir.
Yaxın günlərdə yeni istirahət mərkəzlərinin inşasına başlanacaqdır.
Bölmənin digər xəbərləri
