GÜRCÜSTAN AZƏRBAYCANA ELEKTRİK ENERJİSİ İXRACINI TEXNİKİ SƏBƏBLƏRƏ GÖRƏ DAYANDIRMIŞDIR
Gürcüstan “Qardabani” elektrik xətləri ilə Azərbaycana elektrik enerjisi nəqlini müvəqqəti dayandırmışdır.
AZƏRTAC Gürcüstan KİV-lərinə istinadla xəbər verir ki, bunu “Gürcüstanın elektrik enerjisi sisteminin kommersiya operatoru” (ESCO) Məhdud Məsuliyyətli Cəmiyyətindən (MMC) bildirmişlər.
MMC-nin energetika şöbəsinin müdiri Malxaz Broladzenin sözlərinə görə, Azərbaycana elektrik enerjisi ötürülməsi güclü qasırğadan sonra “Qardabani” elektrik xətlərində yaranmış texniki problemlər üzündən dayandırılmışdır. Onun sözlərinə görə, nasazlıq yaxın günlərdə aradan qaldırılacaq və Azərbaycana elektrik enerjisi ixracı bərpa ediləcəkdir.
M.Broladze demişdir ki, Gürcüstan bu il Azərbaycana barter sxemi ilə elektrik enerjisi mübadiləsi haqqında saziş əsasında təxminən 50 milyon kilovat-saat elektrik enerjisi ixrac etmişdir. Bundan əlavə, hazırda Türkiyəyə gündə 1,5 milyon kilovat-saat elektrik enerjisi ixracı elə həmin sxem üzrə davam etdirilir və ola bilsin, tezliklə Rusiya ilə də elektrik enerjisi mübadiləsi bərpa ediləcəkdir.
Razılaşmaya görə, Gürcüstan yaz və yay mövsümlərində qonşu ölkələrə nəql etdiyi elektrik enerjisini payız-qış mövsümlərində elə həmin həcmdə geri alacaqdır.
Hazırda Gürcüstanın su elektrik stansiyalarında hasil olunan elektrik enerjisinin gündəlik həcmi 22,5 milyon kilovat-saat, istehlakı isə 21 milyon kilovat-saatdır.
Bölmənin digər xəbərləri
