Bakı, 13 iyun, AZƏRTAC

Ermənistan regionda vəziyyəti gərginləşdirməyə çalışmaqla Azərbaycanla münasibətlərin normallaşdırılması təşəbbüslərinə qarşı çıxır. Son günlər bu ölkənin silahlı qüvvələrinin bölmələri Azərbaycan Ordusunun mövqelərini atıcı silahlardan intensiv atəşə tutur. Amma belə təxribatlar rəsmi İrəvanın özü üçün problemlər yaradacaq. Belə ki, Ermənistan müharibədə məğlub olub, ona görə də mövcud reallıqlarla barışmalı, razılaşmalara, o cümlədən götürdüyü öhdəliklərə əməl etməlidir. Qarşı tərəf sabitliyin bərqərar olmasında maraqlı deyil. İndiyədək Qarabağdakı separatçılar müxtəlif istiqamətlərdə uzunmüddətli fortifikasiya qurğularının quraşdırılmasına cəhd göstərib. Azərbaycan Müdafiə Nazirliyinin mətbuat xidmətinin sonuncu məlumatına görə, iyunun 12-də qeyri-qanuni erməni silahlı dəstələrinin üzvləri saat 11:15-dən 16:50-dək kənd təsərrüfatı işləri adı altında Ordumuzun Füzuli və Laçın rayonları istiqamətlərindəki mövqelərinin qarşısında növbəti dəfə uzunmüddətli fortifikasiya qurğularını quraşdırmağa cəhd göstəriblər. Azərbaycan Ordusunun bölmələrinin gördüyü təxirəsalınmaz tədbirlər nəticəsində aparılan işlər dərhal dayandırılıb. Erməni hərbi birləşmələri Qarabağ ərazisində Azərbaycan Ordusuna qarşı mühəndis-istehkam tədbirləri həyata keçirməklə orada yenidən möhkəmlənməyə cəhd edirlər. Hesab edirəm ki, bu məqama xüsusi diqqət göstərilməlidir.

Bu barədə AZƏRTAC-a açıqlamasında Xəzər Müdafiə Tədqiqatları Mərkəzinin rəhbəri, hərbi şərhçi Ramil Məmmədli bildirib.

Onun sözlərinə görə, ümumiyyətə, fortifikasiya hərbi-texniki termindir. Bu geniş mənanı əhatə edir. Qısa formada fortifikasiya müxtəlif ərazilərdə mühəndis-istehkam sistemlərinin formalaşdırılması, müdafiə xəttinin qurulması deməkdir. Yəni, ərazidə süni şəkildə su hövzəsinin yaradılması, həmçinin yeni istehkamların, keçilməz xətlərin formalaşdırılması, beton divarların yaradılması, həm yerüstü zirehli texnikaların, həm də piyada qoşun növlərinin hərəkətinə mane olan qurğuların formalaşdırılmasıdır. Həmçinin ümumi mühəndis-istehkam sistemində qorunan yarımzirehli müşahidə məntəqələrinin yaradılmasıdır. Bununla silah və texnikaların səmərəli istifadəsi, qoşunların davamlı idarəetməsinin təmin olunması, şəxsi heyətin mühafizəsi nəzərdə tutulur.

Ramil Məmmədli qeyd edib ki, bu, Azərbaycan Ordusu ilə Qarabağda yaşayan ermənilər arasında yeni müdafiə xəttinin yaradılmasıdır: “Vaxtilə Ermənistanın keçmiş müdafiə naziri Seyran Ohanyanın təşəbbüsü ilə formalaşdırıldığına görə biz inşa olunan bu müdafiə səddinə Ohanyan xətti deyirdik. Lakin indi S.Ohanyan yoxdur. Lakin ermənilər bu xətti çəkməyə çalışırlar. Düşünürəm, bu səddin çəkilməsi Qarabağ ərazisində Ermənistan ordusunun, erməni hərbi birləşmələrinin daha təşkilatlanmış formada həmin ərazilərdə müdafiəsinin təşkilinə gətirib çıxara bilər. Bu isə yeni təmas xəttinin qurulması deməkdir”.

Hərbi şərhçi fortifikasiya qurğularının qanunsuz erməni silahlı dəstələrinin müqavimət gücünü artırmaq məqsədi daşıdığını da bildirilib: “Erməni separatçıları Qarabağda öz mövqelərini möhkəmləndirmək istəyirlər. Məqsədlərindən biri də ordumuza qarşı müxtəlif əməliyyatlar keçirməkdir. Onlar həm də ordumuzla öz aralarında təmas xətti formalaşdırmağa çalışırlar. Lakin 44 günlük Vətən müharibəsindən sonra təmas xətti anlayışı artıq yoxdur. Bütün hallarda ermənilərin bu hərəkətləri yolverilməzdir. Bütün bu təxribatların qarşısı alınmalıdır və alınır.

Eləcə də biz görürük ki, son zamanlar ermənilər həm şərti dövlət sərhədində, həm də Rusiya sülhməramlı missiyasının müvəqqəti yerləşdirildiyi Azərbaycan ərazilərində tez-tez ordumuzun mövqelərinə atəş açırlar. Əlbəttə ki, onlara layiqli cavab verilir. Amma bütün bunlar qeyri-qanuni erməni hərbi dəstələrinin Qarabağdan tamamilə çıxarılmasını zəruri edir. Bu, 2020-ci il 10 noyabr üçtərəfli Bəyanatının tələblərindən biridir. Ermənistanın hərbi birləşmələrinin müəyyən hissəsinin hələ də Qarabağda qalması bu sənədə ziddir. Əgər qanunsuz erməni hərbi dəstləri ərazilərimizdən çıxarılmasa, əksinə təxribatlarını davam etdirsələr, o zaman ordumuz tərəfindən Qarabağda növbəti antiterror əməliyyatı keçirilməsi qaçılmaz olacaq”, - deyə mərkəzin rəhbəri əlavə edib.