“Həsən bəy Zərdabinin insan və ətraf mühitlə bağlı fəlsəfi baxışları” - elmi seminar
Bakı, 23 aprel, AZƏRTAC
Bakı Dövlət Universitetinin (BDU) Sosial elmlər və psixologiya fakültəsinin Fəlsəfə tarixi və mədəniyyətşünaslıq kafedrasının və Biologiya fakültəsinin birgə təşəbbüsü ilə “Həsən bəy Zərdabinin insan və ətraf mühitlə bağlı fəlsəfi baxışları” mövzusunda elmi seminar keçirilib.
BDU-dan AZƏRTAC-a bildirilib ki, seminarda Biologiya fakültəsinin dekanı professor Afət Məmmədova Həsən bəy Zərdabinin təbiətşünaslıq elminə verdiyi mühüm töhfələri vurğulayıb. O qeyd edib ki, təbiətə qayğı və ətraf mühitin qorunması Həsən bəy Zərdabinin əsas amallarından biri olub. Onun təbiət və insan harmoniyasını təcəssüm etdirən elmi əsərləri təbiətşünaslıq elminə, xüsusilə Azərbaycan təbiətşünaslığına böyük töhfə verib: “Həsən bəy Zərdabi sanki iki yüz il öncə günümüzdəki ətraf mühit problemlərini görür, insanların təbiətdən harmoniya ilə istifadəsini təşviq edirdi. Hazırda ölkəmizdə ətraf mühitin qorunması dövlət siyasətinin prioritetlərindəndir, bununla bağlı dövlət proqramları və qanunlar qəbul olunub”.
Universitetin Fəlsəfə tarixi və mədəniyyətşünaslıq kafedrasının müdiri professor Rəbiyyət Aslanova Həsən bəy Zərdabinin həyat və yaradıcılığından, “Əkinçi” qəzetindəki maarifçilik fəaliyyətindən bəhs edərək, tələbələrə görkəmli alimin yaradıcılığını dərindən öyrənməyi tövsiyə edib.
Seminarda BDU-nun Fəlsəfə tarixi və mədəniyyətşünaslıq kafedrasının müəllimi, tədqiqatçı-jurnalist Elçin Sərdarov “Həsən bəy Zərdabinin cəmiyyətin ekoloji təfəkkürünün formalaşdırılmasında elmi-publisistik fəaliyyəti” mövzusunda təqdimatla çıxış edib. Təqdimatda Həsən bəy Zərdabinin təhsildə, elmdə və ictimai fəaliyyətində uğurları, “Cəmiyyəti-Xeyriyyə” təşkilatındakı fəaliyyəti, “Əkinçi” qəzetində dərc edilmiş “Torpaq, su və hava”, “İnsanın həyatında işıq”, “Gigiyena”, “Təbii seçmə” və “İnsanın mənşəyi” əsərləri haqqında məlumat verilib. Elçin Sərdarov, həmçinin Zərdabinin “Çiçəklərin və ağacların əkilməsi bayramı” və “Bakı quberniyasının Quba qəzasının su hövzəsi kimi əhəmiyyəti haqqında” məqalələrinin də mövzu baxımdan aktuallığını vurğulayıb.
Seminar zamanı tələbələr Həsən bəy Zərdabinin təbiətlə insan arasında harmoniyaya dair fikirlərini səsləndirib, müasir dövrdə ölkəmizdə təbiətin mühafizəsinə göstərilən dövlət qayğısı haqqında müzakirələr aparıblar.
Bölmənin digər xəbərləri
