İƏT-in XIV Zirvə toplantısı İslam dünyasının problemlərinin həll yollarını müzakirə edəcək
Məkkə, 30 may, Şıxəli Əliyev, AZƏRTAC
Xəbər verdiyimiz kimi, mayın 31-də Məkkə şəhərində İslam Əməkdaşlıq Təşkilatının XIV Zirvə toplantısı keçiriləcək.
AZƏRTAC xəbər verir ki, iki Müqəddəs Məkanın Xadimi, Səudiyyə Ərəbistanı Kralı Salman bin Əbdüləziz Al Səudun sədrliyi və İƏT-ə üzv ölkələrin dövlət və hökumət başçılarının iştirakı ilə, “Məkkə Sammiti: Gələcəyə doğru birlikdə gedək” devizi altında keçiriləcək tədbirdə İslam dünyasının üzləşdiyi müxtəlif problemlər, o cümlədən Fələstin, Suriya, Yəmən, Liviya, Sudan, Somalidəki son vəziyyət barədə fikir mübadiləsi aparılacaq, təhdidlərə qarşı İslam ölkələrinin vahid mövqedən çıxış etməsinin əhəmiyyəti qeyd olunacaq.
Zirvə toplantısının iştirakçıları, həmçinin müsəlman azlıqların problemlərini, islamafobiya hallarını, terror və ekstremizmlə mübarizənin zəruriliyi və digər siyasi, iqtisadi, mədəni və sosial problemləri müzakirə edəcəklər.
Qeyd edək ki, budəfəki Zirvə Toplantısı İslam Əməkdaşlıq Təşkilatının yaranmasının 50-ci ildönümünə təsadüf edir.
Xatırladaq ki, İƏT-in XIII sammiti 2016-cı il aprelin 14-15-də Türkiyənin İstanbul şəhərində keçirilib.
Bölmənin digər xəbərləri
