Ağcabədi, 18 iyul (AZƏRTAC). Ağcabədi Rayon Mədəniyyət Evində 2014-cü ilin birinci yarısının sosial-iqtisadi inkişafının yekunlarına həsr olunmuş yığıncaq keçirilib.

AZƏRTAC xəbər verir ki, yığıncaqda görülən işlər və qarşıda duran vəzifələr barədə məruzə dinlənilib, ilin birinci yarısında iqtisadiyyatın əsas sahələri üzrə uğurlu nəticələr qazanıldığı, tikinti-quruculuq işlərinin davam etdirildiyi diqqətə çatdırılıb.

Bildirilib ki, hesabat dövründə Ağcabədi şəhərində geniş abadlıq işləri aparılıb. Hazırda Olimpiya İdman Kompleksinin, şəhərdəki 4 nömrəli körpələr evi-uşaq bağçasının, Fövqəladə Hallar Nazirliyinin Ağcabədi Yanğından Mühafizə Bölməsinin binalarının tikintisi davam etdirilir. Rəncbərlər kəndi ərazisində 5000 tonluq soyuducu anbarın, Ağcabədi şəhərində çörək zavodunun, Yeni Qaradolaq kənd tam orta məktəbi üçün 360 şagird yerlik, Köyük kənd tam orta məktəbi üçün 220 yerlik, Taynaq kənd tam orta məktəbi üçün 180 yerlik yeni binaların tikintisində tamamlanma işləri aparılır, Kürdlər kənd tam orta məktəbi əsaslı təmir edilir.

Məlumat verilib ki, birinci yarımildə rayonda iqtisadiyyatın əsas sahələri üzrə məhsul buraxılışının həcmi 140.780,1 min manat olub ki, bu da əvvəlki illə müqayisədə 15,5 faiz çoxdur. Bu dövrdə 8317,2 min manatlıq sənaye, 62.622,1 min manatlıq kənd təsərrüfatı məhsulları istehsal edilib, əsas kapitala 42.152,6 min manat investisiya yönəldilib. 2013-cü ilin eyni dövrü ilə müqayisədə sənaye məhsulları istehsalı 1,9 dəfə, kənd təsərrüfatı məhsulları istehsalı 18,5 faiz, əsas kapitala yönəldilən investisiyalar 3,8 faiz artıb. Altı ay ərzində 777-si daimi olmaqla 1602 yeni iş yeri açılıb.

Yığıncaqda aqrar sahədə əldə olunan uğurlardan bəhs olunarkən bildirilib ki, İqtisadiyyat və Sənaye Nazirliyinin Sahibkarlığa Kömək Milli Fondu tərəfindən 167 sahibkara 4,9 milyon manat güzəştli kredit verilib və bunun nəticəsində 365 yeni iş yeri yaradılıb.

Hesabat dövründə 69 min 089 ton buğda, 16 min 218 ton arpa istehsal olunub. Özəl pilot taxılçılıq təsərrüfatında hər hektardan orta hesabla 55,5 sentner məhsul götürülüb.

Yığıncaqda elektrik enerjisi, təbii qaz və su ilə təminat, təhsilin, mədəniyyətin və səhiyyənin inkişafı sahəsində görülən işlər ətraflı təhlil edilib, əhalinin həyat şəraitinin yaxşılaşdırılması istiqamətində ardıcıl işlər görüldüyü diqqətə çatdırılıb.

Çıxışlarda nailiyyətlərlə yanaşı, mövcud problemlərdən də bəhs olunub, onların həlli yolları müzakirə edilib.