İLİSUDAKI MÜDAFİƏ QALASI BƏRPA EDİLİR
Nazir və rayon rəhbərliyi əvvəlcə Əmbərçay kəndinin yaxınlığında yerləşən və yerli əhali tərəfindən ziyarətgah hesab edilən Kürmük məbədinə gedərək, yaxın gələcəkdə təmir işlərinin aparılması ilə bağlı nəzərdə tutulmuş layihələrlə tanış oldular.
İlisu kəndinin ərazisində yerləşən Sumuq qala dövlət tərəfindən mühafizə olunan abidələr sırasına daxildir. Rayon icra hakimiyyətindən AZƏRTAC-ın müxbirinə bildirmişlər ki, qalada bərpa işləri Mədəniyyət Nazirliyinin Şəkidəki 4 nömrəli Elmi bərpa istehsalat idarəsi tərəfindən aparılır. İlkin layihə üzrə bərpa işləri üçün tələb olunan 190 milyon manat vəsaiti Mədəniyyət Nazirliyi ayırır. Gələcəkdə bölgədə turizmin inkişaf perspektivlərini nəzərə alaraq, qala ilə bağlı yeni layihələrin hazırlanması və əlavə maliyyə vəsaiti ayrılması proqnozlaşdırılır.
Hazırda abidənin ətrafı torpaq, çınqıl və qumdan təmizlənir. Qalanın torpaq altında qalan 2 mərtəbəsinin ətrafı təmizlənərək üzə çıxarılmışdır. Ehtimala görə, bu müdafiə qalası 5 mərtəbədən və dam örtüyündən ibarət olmuşdur. Bərpa işləri başa çatdıqdan sonra abidə tam şəkildə öz əvvəlki görkəmini alacaqdır.
Bölmənin digər xəbərləri
