Bakı, 11 may (AZƏRTAC). Azərbaycanın İndoneziyadakı səfirliyindən bildirmişlər ki, ümummilli liderimiz Heydər Əliyevin anadan olmasının 87-ci ildönümü münasibətilə mayın 11-də Cakartadakı “Alila” hotelində “Azərbaycana İndoneziyadan baxış” kitabının təqdimatı keçirilmişdir.

Kitabın müəllifi “The Jakarta Post” qəzetinin redaktor müavini V.Anjaiahdır.

Mərasimdə V.Anjaiah Azərbaycanın tarixindən, bugünkü inkişafından, regionda və dünyada rolundan, geostrateji imkanlarından, Ermənistan-Azərbaycan, Dağlıq Qarabağ münaqişəsindən danışmışdır.

Müəllif Azərbaycanın müstəqilliyini bərpa etdikdən sonra üzləşdiyi problemlərə toxunmuş, ulu öndər Heydər Əliyevin müdrik və uzaqgörən siyasəti nəticəsində ölkənin vətəndaş qarşıdurmasından və müstəqilliyini itirmək təhlükəsindən xilas olunduğunu vurğulamışdır.

“The Jakarta Post” qəzetinin baş redaktoru Andi Bayuni kitabın ölkələrimiz arasında əlaqələrin inkişafına töhfə verəcəyinə əminlik bildirmişdir.

İndoneziya Xarici İşlər Nazirliyinin Baş Direktorluğunun rəisi Andri Hadi Azərbaycan ilə İndoneziya arasında son illər əlaqələrin sürətlə inkişaf etdiyini demiş, dost xalqlarımızın gələcəkdə də münasibətlərini və əməkdaşlığını genişləndirəcəyini vurğulamışdır. O, tezliklə İndoneziya barədə kitabın Azərbaycanda nəşr olunacağına, ölkələrimiz arasında əlaqələrin beynəlxalq təşkilatlarda davamlı inkişaf edəcəyinə ümid etdiyini demiş, Azərbaycanın İndoneziyada zəlzələdən zərər çəkmişlərə yardımına görə minnətdarlığını bildirmişdir.

Azərbaycan səfiri İbrahim Hacıyev yeni kitabın səfirlik tərəfindən ingilis və İndoneziyanın bahasa dillərində nəşr edilmiş altıncı kitabın olduğunu demişdir.

Diplomat Prezident İlham Əliyevin ulu öndər Heydər Əliyevin siyasətini uğurla davam etdirdiyini, son illər ölkəmizdəki inkişaf və quruculuq işlərinin yüksək sürətlə davam etdiyini, Azərbaycanın beynəlxalq aləmdə özünəməxsus yer tutduğunu vurğulamışdır.

İ.Hacıyev kitabın ölkəmizi İndoneziyada daha geniş tanıdacağına ümid etdiyini demiş, İndoneziyanın Ermənistan-Azərbaycan, Dağlıq Qarabağ münaqişəsinin həllində Azərbaycanı daim dəstəklədiyinə görə minnətdarlıq etmişdir.

Sonda mərasim iştirakçılarına yeni nəşr edilmiş kitab paylanılmışdır.