KOMPYUTERLƏRİN GƏLƏCƏYİNİ MÜƏYYƏNLƏŞDİRƏN LAYİHƏLƏR
AZƏRTAC xəbər verir ki, İntel korporasiyası ABŞ-ın Mauntin-vyu şəhərindəki (Kaliforniya ştatı) Kompyuter Tarixi Muzeyində öz laboratoriyalarında hazırlanmış və ekologiyaya, səhiyyəyə, qrafikanın köməyi ilə hesablamalara, simsiz mobil variantlara və s. həsr olunmuş 70-dən çox fantastik layihə və konsepsiya təqdim etmişdir. Şirkət sözügedən tədqiqatlara hər il 6 milyard dollar vəsait qoyur.
İntelin baş texniki direktoru Castin Rattner demişdir: “Tarix göstərir ki, elmi tədqiqatlara sərmayələrin yatırılması gələcəkdə innovasiyaların rəhnidir”. O bildirmişdir ki, tədqiqatlara yatırılan bugünkü sərmayələr sayəsində yaranacaq texnologiyalar insanın kompyuterlə qarşılıqlı əlaqəsini, ətraf mühiti əhəmiyyətli dərəcədə dəyişdirəcəkdir. C.Rattner onu da vurğulamışdır ki, İntel ilk növbədə, tədqiqatların maliyyələşdirilməsi hesabına nəinki mükəmməl məhsul yaradır, həm də bütün sahə üçün istiqamətləri müəyyənləşdirir.
Şirkətin tədqiqatlara və araşdırmalara son 10 ildə iki dəfə çox sərmayə yatırması sayəsində ərsəyə gəlmiş bu layihələr yeni elmi kəşflər üçün imkanlar açır, səhiyyənin keyfiyyətini, ekoloji vəziyyəti yaxşılaşdırmağı, vizual hesablamanın inkişafını və dünyanın istənilən guşəsindən istənilən cihazla internetə çoxfunksiyalı simsiz girişi təmin edir.
