Koreyalı mütəxəssislər tərəfindən hazırlanmış kurikulumların təqdimatı olub
Bakı, 10 may, AZƏRTAC
Təhsil Nazirliyi yanında Peşə Təhsili üzrə Dövlət Agentliyində Təhsil İnstitutunun və Koreya İnsan Resursları İnkişafı Xidmətinin nümayəndələri ilə növbəti görüş keçirilib.
Nazirlikdən AZƏRTAC-a bildiriblər ki, görüşdə Azərbaycan və Koreya hökumətləri arasındakı razılaşmaya uyğun olaraq, Sənaye və İnnovasiyalar üzrə Bakı Dövlət Peşə Təhsil Mərkəzinin bazasında Koreya təhsil standartları əsasında yaradılacaq Peşə Təhsil Mərkəzində tədrisi nəzərdə tutulan 8 ixtisas (elektronika, elektrik, avtomatlaşdırma, avtomobil, tikinti, sənaye və quraşdırma, İKT, mexanika) üzrə hazırlanmış təhsil proqramları (kurikulumlar) və tədris vəsaitləri təqdim olunub.
Koreyalı ekspertlər təhsil proqramları və tədris vəsaitləri barədə geniş məlumat verərək, səriştə əsaslı kurikulumların 80 faiz təcrübəyə əsaslanmaqla tərtib edildiyini bildiriblər.
Görüşdə, həmçinin layihə çərçivəsində təhsil proqramlarından istifadə edəcək ixtisaslı kadrların təlimləndirilməsi və hazırlığı məsələlərinə dair fikir mübadiləsi aparılıb.
Təqdim olunan kurikulumlar və tədris modulları Peşə Təhsili üzrə Dövlət Agentliyinin nümayəndələri tərəfindən müsbət dəyərləndirilib, onların tətbiqinin peşə təhsilinin, eləcə də təhsilalanların bilik və bacarıqlarının inkişafında xüsusi önəm kəsb edəcəyi vurğulanıb.
Bölmənin digər xəbərləri
