KÜRDƏMİRDƏ MİLLİ QURTULUŞ GÜNÜ QEYD EDİLMİŞDİR
AZƏRTAC xəbər verir ki, Kürdəmirdəki Heydər Əliyev muzeyində 15 iyun - Milli Qurtuluş gününə həsr olunmuş elmi praktiki konfrans keçirilmişdir.
Konfransda rayon icra hakimiyyəti başçısı aparatının işçiləri, idarə, müəssisə rəhbərləri, rayon ağsaqqalları, ziyalıları, gəncləri, ictimai təşkilatlar və siyasi partiyaların nümayəndələri iştirak etmişlər.
Ulu öndərin şəhərin mərkəzi meydanında ucaldılmış abidəsinin önünə gül dəstələri qoyan konfrans iştirakçıları Heydər Əliyev muzeyinin eksponatları ilə tanış olmuşlar.
Konfransı giriş sözü ilə rayon icra hakimiyyətinin başçısı Fəxrəddin Məlikov açmış, tarix elmləri namizədi Lətifə Məmmədovanın “Tarixi qayıdış və xalqın qurtuluşu”, şair-publisist Ramiz Dənizin “Qurtuluşumuz tarixi sənədlərdə”, Azərbaycan Respublikası Prezidentinin İşlər İdarəsi Prezident Kitabxanasının müdiri Mayıl Əhmədovun “Heydər Əliyev mədəni irsimizin xilaskarıdır” mövzularında məruzələri dinlənilmişdir.
Natiqlər ulu öndər Heydər Əliyevin xilaskarlıq missiyasından, müstəqil Azərbaycan quruculuğu yolundakı şərəfli mübarizəsindən danışmış, bütün dünya tərəfindən qəbul edilən dahi siyasi xadim və lider olduğunu vurğulamışlar. Məruzələrdə ümummilli liderimizin 1993-cü ildə hakimiyyətə qayıdışı ilə ölkəmizi xaos və parçalanmadan, məhv olmaq təhlükəsindən, qardaş qırğınından xilas etməsi barədə geniş söz açılmışdır.
Şərəf tariximiz olan Milli Qurtuluş günündən ötən 15 il ərzində ölkəmizdə gedən sosial-iqtisadi yüksəlişdən iftixarla danışan natiqlər Prezident İlham Əliyevin Azərbaycan dövlətçiliyinin inkişaf etdirilməsi sahəsindəki xidmətlərini diqqətə çatdırmışlar.
Konfransda Prezidentin İcra Aparatı ictimai-siyasi məsələlər şöbəsinin sektor müdiri Vüqar Əliyev iştirak etmişdir.
Bölmənin digər xəbərləri
