Lənkəranda 9 May-Qələbə Günü təntənə ilə qeyd edilmişdir
Lənkəran, 9 may (AZƏRTAC). Mayın 9-da Lənkəran şəhərində İkinci Dünya müharibəsində alman faşizmi üzərində Qələbənin 69-cu ildönümü təntənə ilə qeyd edilmişdir.
AZƏRTAC xəbər verir ki, rayonun rəhbər işçiləri, müharibə veteranları, arxa cəbhənin iştirakçıları, hüquq mühafizə orqanlarının, ictimaiyyətin nümayəndələri əvvəlcə Böyük Vətən müharibəsində həlak olmuş lənkəranlıların xatirəsini əbədiləşdirmək üçün ucaldılan “Naməlum əsgər”in abidəsi önünə gül dəstələri düzərək o qanlı-qadalı illərdə həlak olanların xatirəsini ehtiramla yad etmişlər.
Bayram mərasimi iki dəfə Sovet İttifaqı Qəhrəmanı, tank qoşunları qvardiya general-mayoru Həzi Aslanovun abidəsi önündə davam etdirilmişdir.
Lənkəran Şəhər İcra Hakimiyyətinin rəhbərliyi müharibə veteranları ilə görüşərək onları əlamətdar gün münasibətilə təbrik etmişdir.
Tədbir iştirakçıları Qəhrəmanın abidəsi önünə gül dəstələri düzərək xatirəsini yad etmişlər.
Mərasimdə məktəblilərin ifasında hərbi-vətənpərvərlik mövzusunda ədəbi-bədii kompozisiya nümayiş etdirilmişdir.
Mərasim iştirakçıları Həzi Aslanovun Lənkəran şəhərindəki ev-muzeyinə gələrək, qəhrəmanın həyat və döyüş yolunu əks etdirən ekspozisiyalarla tanış olmuşlar.
Bayram şənliyi Lənkəran şəhərindəki “Veteranlar klubu”nda şirniyyat stolu arxasında davam etmişdir.
Mərasimdə ulu öndər Heydər Əliyevin Azərbaycanda ikinci dəfə siyasi hakimiyyətə qayıdışından sonra veteranlara göstərilən dövlət qayğısından danışılmış, hazırda Prezident İlham Əliyevin bu siyasəti uğurla davam etdirdiyi diqqətə çatdırılmışdır,
Mərasimdə çıxış edən müharibə veteranları diqqət və qayğıya görə Azərbaycan Respublikasının Prezidenti İlham Əliyevə minnətdarlıqlarını bildirmişlər.
Tədbirdə bir qrup Əfqanıstan müharibəsi veteranına “Əfqanıstanda döyüş əməliyyatlarının bitməsinin 25 illiyi” medalı təqdim olunmuşdur.
Bölmənin digər xəbərləri
