MAYASI GÜLÜŞ VƏ MUSİQİ İLƏ YOĞRULMUŞ ÖMÜR
Teatr sənəti insanlarda müxtəlif hisslər doğurur. Bu hisslər tamaşaçıları sevindirmək, düşündürmək, ürəkdən güldürmək, onlarda xeyirxahlığa və gözəlliyə məhəbbət oyatmaqdan ibarətdir. Aktyor tamaşaçı məhəbbəti qazanmağı, özünü unudub yalnız sənət üçün yaşamağı bacarmalıdır. Qüdrətli gülüş ustası, Azərbaycan səhnəsinin parlaq ulduzu,
xalqımızın sevimli sənətkarı Nəsibə Zeynalovanın həyat və yaradıcılığı bu cəhətdən çox qiymətli və təqdirəlayiqdır.
AZƏRTAC xəbər verir ki, aprelin 22-də Şıxəli Qurbanov adına Azərbaycan Dövlət Musiqili Komediya Teatrında xalq artisti, Dövlət mükafatı laureatı Nəsibə Zeynalovanın 90 illik yubileyi qeyd edilmişdir.
Mədəniyyət və turizm naziri Əbülfəs Qarayev Azərbaycan teatrsevərləri arasında «qaynana» kimi sevilən, milli teatrımızın inkişafında müstəsna rol oynayan, ömrünün 60 ilini səhnəyə həsr edən Nəsibə xanımın həyat və yaradıcılığından söhbət açmışdır.
Görkəmli sənətkar 1916-cı il aprelin 20-də Bakıda, tanınmış aktyor Kərbəlayi Cahangir Zeynalovun ailəsində dünyaya göz açmışdır. Atası ilk və yeganə övladının - Nəsibənin onun sənətini davam etdirməsini arzulamışdır.
Yaradıcılığının mayası gülüş və musiqi ilə yoğrulmuş Nəsibə Zeynalova orta məktəbdə oxuyarkən rəqs dərnəyinə getmiş, milli oyun havalarının mürəkkəb və lirik incəliklərinə yiyələnmişdir. 1932-ci ildə Rza Təhmasibin dram dərnəyinə üzv olmuşdur. 1937-ci ildə Bakıda 1934-cü ildən mövsümi fəaliyyət göstərən səyyar kolxoz və sovxoz teatrında aktrisa işləməyə başlamışdır. Bu teatr Bakıda truppa toplayır, özünə repertuar qurur, aprel ayından başlayaraq, kənd təsərrüfatının qızğın çağlarında rayonlarda tamaşalar oynayırdı.
Bir il burada çalışan Nəsibə Zeynalova 1938-ci il aprelin 4-də yenicə yaranan Azərbaycan Dövlət Musiqili Komediya Teatrının truppasına birinci dərəcəli aktrisa kimi qəbul olunmuşdur.
Həmin il Bakı Teatr Məktəbinə daxil olaraq orada aktyorluq təhsili almışdır. Aleksandr Tuqanovdan, Məhərrəm Haşımovdan, Ağasadıq Gəraybəylidən dərs alan Nəsibə Zeynalova texnikumda oxuyarkən Katarina (“Şıltaq qızın yumşalması”), Elvira (“Don Juan”), Yelizaveta (“Mariya Stüart”) rollarını oynamışdır.
Teatr Xadimləri İttifaqının sədri Azərpaşa Nemətov Nəsibə Zeynalovanın yaradıcılığının ən parlaq dövrünün musiqili komediyalardakı komik personajlarla bağlı olduğunu bildirmişdir. Xüsusilə onun ifasında Cənnət xala, Nargilə, Züleyxa rollarının zəngin ifadə vasitələri, yumorun milliliyi, təbiiliyi ilə səhnəmizin nadir inciləri sırasına daxil olduğunu söyləmişdir. Azərpaşa Nemətov bildirmişdir ki, İttifaqa sədrlik etdiyi müddətdə korifey sənətkara “Qızıl Dərviş” və Teatr Xadimləri İttifaqının “Qızıl medal”ını təqdim etmişdir.
Bildirilmişdir ki, Azərbaycan televiziyasında onlarla yumoristik səhnəcikdə, teletamaşalarda çıxış etmiş Nəsibə Zeynalova, həmçinin «Azərbaycanfilm»in çoxlu ekran əsərlərinə də çəkilmişdir. Onun kino obrazları içərisində Fatmanisə (“Ögey ana”), Telli (“Böyük dayaq”), Züleyxa (“Ulduz”), Cənnət xala (“Qaynana”), Gülsüm (“Molla Fətəlinin sərgüzəşti”), Əsli xala (“Bəyin oğurlanması”) rolları geniş tamaşaçı məhəbbəti qazanmışdır.
Qeyd olunmuşdur ki, teatrımızın inkişafında böyük xidmətlərinə görə Nəsibə xanım Azərbaycan Respublikasının xalq artisti fəxri adına layiq görülmüş, Dövlət mükafatı laureatı olmuşdur. N.Zeynalovanın yaradıcılığı barədə “Aktrisanın təbəssümü” televiziya filmi çəkilmişdir.
Xalq artistləri Afaq Bəşirqızı, Yaşar Nuri, İlham Namiq Kamal Nəsibə Zeynalovanın əziz xatirəsinin teatrsevərlərin qəlbində əbədi yaşayacağını bildirmişlər.
Tədbirdə görkəmli sənətkarın çəkildiyi filmlərdən və oynadığı teatr tamaşalarından fraqmentlər nümayiş etdirilmişdir. Musiqili Komediya Teatrının aktyorları Novruz Qartal, Ramiz Məmmədov, Elçin Həmidov Nəsibə Zeynalovanın oynadığı tamaşalardan parodiyalar ifa etmiş, incəsənət ustalarının maraqlı çıxışları olmuşdur.
Xalq artisti Gahangir Novruzov anasının xatirəsinə göstərilən ehtirama görə tədbirin təşkilatçılarına və Nəsibə Zeynalovanın pərəstişkarlarına minnətdarlığını bildirmiş, görkəmli sənətkarla bağlı xatirələrini söyləmişdir.
Bölmənin digər xəbərləri
