Mərkəzi Elmi Kitabxananın fonduna Macarıstan Elmlər Akademiyasından jurnallar daxil edilib
Bakı, 7 may, AZƏRTAC
AMEA-nın Mərkəzi Elmi Kitabxanasına (MEK) Macarıstan Elmlər Akademiyasının “Acta Orientalia” və “Keletkutatás” (Şərq araşdırmaları) jurnalları daxil olub.
MEK-dən AZƏRTAC-a bildirilib ki, “Acta Orientalia” jurnalında şərq filologiyası və mədəniyyətinə dair ingilis, alman, fransız və rus dillərində olan məqalələr toplanıb. Təqdim edilən nömrədə “Türk dillərində ümumiləşmə və individuallaşma”, “Kiyev şəhərinin qədim türk adı”, “Yapon və Altay linqvistikası”, “Monqol çobanlarının oyunları”, “Monqol şaman mahnıları”, “Danimarka kolleksiyasında qədim Yaxın Şərq möhürləri”, Tibet və Hind-Tibet araşdırmaları üzrə “Tibetdə Ramanın tarixi” adlı məqalələr və digər yazılar yer alıb.
“Acta Orientalia” və “Keletkutatás” jurnalları MEK-in elektron kolleksiyaları ilə yanaşı, kitabxananın Şərq ədəbiyyatı fondunda da yer alıb.
Qeyd edək ki, jurnalların elektron nüsxəsi MEK-in oxu zallarında və ya [email protected] elektron poçtuna göndərilən sorğu vasitəsilə istifadəyə verilir.
Bölmənin digər xəbərləri
