Bakı, 25 sentyabr (AZƏRTAC). Sentyabrın 25-də Milli Məclisdə “Azərbaycan Respublikasının Milli Məclisinə dəstək” Tvininq layihəsinin təqdimatı olmuşdur.

Layihə Avropa İttifaqı ilə Azərbaycan arasında “Avropa qonşuluq siyasəti” planı çərçivəsində həyata keçirilir. Layihənin reallaşdırılmasında Azərbaycana Avropa İttifaqı tərəfindən tərəfdaş ölkə kimi seçilmiş Litva kömək edir. Bununla əlaqədar Litva Seymi sədrinin müavini Çeslovas Stankəviçus Bakıda səfərdədir. O, Milli Məclisdə keçirilən təqdimat mərasimində iştirak etmişdir.

Milli Məclis sədrinin müavini, parlamentin təbii ehtiyatlar, energetika və ekologiya komitəsinin sədri Valeh Ələsgərov demişdir ki, Azərbaycan-Litva əlaqələrinin zəngin tarixi vardır. Yarım əsr ərzində xalqlarımız bir dövlətin və vahid siyasi sistemin tərkibində yaşamışlar. Bu illər ərzində elm, təhsil, mədəni sahələrdə sıx əməkdaşlıq yaranmışdır. Ölkələrimiz müstəqilliyini bərpa etdikdən sonra əlaqələrimiz keyfiyyətcə yeni məna kəsb etmişdir. Bu gün münasibətlərimizin daha da möhkəmlənməsində hər iki ölkə başçısının qarşılıqlı səfərləri və görüşləri mühüm rol oynayır. Həmin görüşlər zamanı aparılmış danışıqlar və imzalanmış sənədlər əməkdaşlığımızın daha da genişlənməsi üçün yaxşı zəmin yaratmışdır. Bu günədək Azərbaycanla Litva arasında 27 sənəd imzalanmışdır. Gələcəkdə əlaqələrimizin hüquqi bazasını təşkil edən bu sənədlərin sayının artacağı heç kimdə şübhə doğurmur. Azərbaycanla Litva arasında enerji, kənd təsərrüfatı, turizm, nəqliyyat, humanitar və mədəni sahələrdə əməkdaşlıq üçün geniş imkanlar mövcuddur. Münasibətlərimizin dərinləşməsində parlamentlərimiz mühüm rol oynayır. Parlament nümayəndə heyətlərinin qarşılıqlı səfərləri təcrübə və informasiya mübadiləsi baxımından çox əhəmiyyətlidir. Hər iki ölkənin qanunvericilik orqanında parlamentlərarası əlaqələr üzrə işçi qrupu fəaliyyət göstərir. Biz hesab edirik ki, bu qrupların fəaliyyətinin gücləndirilməsi ümumi işin xeyrinə olardı.

V.Ələsgərov vurğulamışdır ki, Avratlantik məkana inteqrasiya Azərbaycanın strateji seçimidir. Bu baxımdan Avropa İttifaqının Tvininq layihəsi çərçivəsində əməkdaşlığımızı yüksək dəyərləndiririk. Layihədə ölkə qanunvericiliyinin, normativ hüquqi aktların Avropa İttifaqı standartlarına uyğunlaşdırılması istiqamətində Milli Məclisə dəstək göstərilməsini mühüm istiqamətlərdən hesab edirik. İnanırıq ki, Tvininq layihəsi çərçivəsində əməkdaşlıq Avropa strukturlarına inteqrasiya istiqamətində mühüm nəticələrin əldə olunmasında əhəmiyyətli rol oynayacaqdır. Azərbaycan tərəfindən layihə çərçivəsində faydalı əməkdaşlıq məqsədi ilə 4 istiqamət müəyyənləşdirilmiş və sizin ekspertlərin tövsiyəsinə uyğun olaraq bu istiqamətlərə rəhbərlər seçilmişdir.

Hər istiqamət üzrə yüksək səviyyəli hüquqşünas ekspertlərdən, Milli Məclisin əməkdaşlarından və müvafiq qurumların nümayəndələrindən ibarət işçi qrupları yaradılmışdır. Bu istiqamətlərin müəyyənləşdirilməsinin əsas məqsədi Azərbaycan qanunlarının Avropa İttifaqı qanunvericiliyinə yaxınlaşdırılması üçün Milli Məclisdə, parlamentlə icra hakimiyyəti orqanları arasında qanun layihələrinin hazırlanması prosedurlarında iş metodlarını təkmilləşdirməkdir.

Bu tədbiri məhsuldar birgə fəaliyyətin başlanğıcı kimi qiymətləndirən V.Ələsgərov Tvininq layihəsi çərçivəsində həyata keçirilən tədbirlərin dövlətlər və parlamentlərarası münasibətlərin inkişafına layiqli töhfə verəcəyinə, əməkdaşlığımızın beynəlxalq hüquqi müstəvidə keyfiyyətcə yeni səviyyəyə qalxmasına müsbət təsir göstərəcəyinə inamını ifadə etmişdir.

Litva Seymi sədrinin müavini Çeslovas Stankəviçus demişdir ki, Litva ilə Azərbaycan arasında münasibətlər yeni müstəvidə inkişaf etməyə başlamışdır. Bizim ölkələrimizin tarixində oxşar məqamlar çoxdur. Bu layihənin həyata keçirilməsi bizi daha da yaxınlaşdıracaq, münasibətlərimiz daha da dərinləşəcəkdir.

Ç.Stankəviçus onu da qeyd etmişdir ki, Avropa İttifaqı öz qonşuları ilə əlaqələr kontekstində yeni siyasət çərçivəsi, yəni Avropa Qonşuluq Siyasətini qəbul etmişdir. Avropa Qonşuluq Siyasəti hazırda qüvvədə olan Tərəfdaşlıq və Əməkdaşlıq Sazişlərinin hüdudlarını aşaraq, qonşu ölkələrə Avropa İttifaqı ilə getdikcə daha yaxın əlaqələr qurmaq imkanını təklif edir. Siyasətin ümumi qayəsi siyasi və iqtisadi islahatlar prosesini dəstəkləməkdən, daha yaxın iqtisadi inteqrasiyanı, habelə hüquqi və texniki sahələrdə yaxınlaşmanı və dayanıqlı inkişafı təşviq etməkdən ibarətdir. Avropa Qonşuluq Siyasətinin əsas elementi ikitərəfli Fəaliyyət Planıdır. Fəaliyyət Planında siyasətin hədəfləri və qonşu ölkənin bir neçə il ərzində inkişafını qiymətləndirməyə imkan verəcəkdir. Avropa İttifaqı-Azərbaycan Avropa Qonşuluq Siyasəti Fəaliyyət Planında göstərilir ki, Tvininq və TAIEX kimi yeni əməkdaşlıq alətləri Fəaliyyət Planında nəzərdə tutulan prioritetlərə nail olunması baxımından çox əhəmiyyətlidir. Bu layihə Azərbaycanın Avropaya inteqrasiyasını sürətləndirir və asanlaşdırır.

Qonaq vurğulamışdır ki, Litva artıq öz qanunvericiliyini Avropa standartlarına uyğunlaşdıraraq Avropa İttifaqına qəbul olunmuşdur. Biz Azərbaycan qanunvericiliyinin də Avropa qanunvericiliyinə uyğunlaşdırılması üçün əlimizdən gələni edəcəyik.

Avropa Komissiyası Bakı ofisi rəhbərinin səlahiyyətlərini icra edən Jan Lui Lavrov layihənin həyata keçirilməsini yüksək qiymətləndirmişdir. O demişdir ki, Azərbaycan bu layihə çərçivəsində qabaqcıl ölkələrin təcrübəsini öyrənəcək, öz qanunlarını Avropa standartlarına uyğunlaşdırmaqla demokratiyanın və vətəndaş cəmiyyətinin inkişafında yeni nailiyyətlər qazanacaqdır.

Bu layihənin ümumi hədəfləri Azərbaycanda demokratiyanın və qanunun aliliyinin möhkəmlənməsinə töhfə vermək, xüsusilə də qanunvericiliyin Avropa İttifaqı qanunvericiliyinə yaxınlaşdırılmasına yardım etməkdir.

Milli Məclis Aparatının rəhbəri Səfa Mirzəyev isə bildirmişdir ki, Azərbaycan parlamenti BMT, ABŞ və digər ölkələrin müvafiq təşkilatları ilə müxtəlif layihələr həyata keçirmiş və müəyyən təcrübə qazanmışdır. Bu isə Azərbaycan Prezidentinin və Milli Məclis sədrinin ölkəmizdə parlamentarizmin, parlament demokratiyasının inkişafına, qanunların təkmilləşdirilməsinə göstərdikləri diqqət və qayğının bariz nümunəsidir.

S.Mirzəyev də xatırlatmışdır ki, layihənin məqsədi Azərbaycan qanunlarının Avropa İttifaqı qanunvericiliyinə yaxınlaşdırılması prosesini dərinləşdirmək və sürətləndirmək üçün Milli Məclisdə və Milli Məclislə İcra hakimiyyəti orqanları arasında qanun layihələrinin hazırlanması prosedurlarında istifadə olunan iş metodlarını və alətlərini təkmilləşdirməkdir.

Tvininq layihəsi 4 əsas istiqamət - Aİ qanunvericiliyinə yaxınlaşma prosesinin dəstəklənməsi, İcra hakimiyyəti orqanları ilə daha səmərəli əməkdaşlıq əlaqələrinin qurulması, qanunvericiliyin təsirlərinin qiymətləndirilməsi üsullarının işlənib hazırlanması

və Avropa İttifaqı qanunvericiliyi barədə biliklərin artırılması istiqamətləri üzrə həyata keçiriləcəkdir. Bu istiqamətlər üzrə Komponent rəhbərlər təyin olunmuşlar.

Litva Seymi baş katibinin vəzifəsini icra edən Qedeminas Aleksonis ölkəsinin bu layihədə iştirakından məmnun qaldığını bildirmişdir. O demişdir ki, layihənin həyata keçirilməsində Polşa Respublikasının ekspertləri də yaxından iştirak edəcəklər.

Təqdimat başa çatdıqdan sonra KİV nümayəndələri üçün mətbuat konfransı keçirilmişdir.

Milli Məclis Aparatının rəhbəri Səfa Mirzəyev demişdir ki, yaxın günlərdə layihənin icrasına başlanacaqdır. Oktyabr ayında Litvanın və Polşanın nümayəndə heyətləri Avropa İttifaqının ekspertləri qismində Azərbaycana gələcəklər. Səfər çərçivəsində onlar Milli Məclisin fəaliyyəti, qanun yaradıcılığı prosesi, qanunların qəbulu mexanizmi və digər məsələlərlə maraqlanacaq, bu sahədə öz tövsiyələrini verəcəklər. Tvininq layihəsinin həyata keçirilməsi çərçivəsində “Normativ hüquqi aktlar haqqında” yeni qanun layihəsi hazırlanacaq və burada Avropa ölkələrinin müsbət təcrübəsi əksini tapacaqdır.

O, həmçinin bildirmişdir ki, hazırda Milli Məclisdə Avrointeqrasiya bölməsi yaradılmışdır və gələcəkdə onun genişləndirilərək şöbəyə çevrilməsi nəzərdə tutulmuşdur. Bu şöbə yerli qanunvericiliyin Avropa qanunlarına uyğunlaşdırılması ilə məşğul olacaqdır.

Litva Seymi sədrinin müavini Çeslovas Stankəviçus jurnalistlərin suallarına cavab verərkən ölkəsinin Dağlıq Qarabağ münaqişəsi ilə bağlı mövqeyini açıqlamışdır. O demişdir ki, Litva bu münaqişənin dövlətlərin ərazi bütövlüyü çərçivəsində, sülh yolu ilə həllinə tərəfdardır. Sonra brifinq iştirakçıları jurnalistləri maraqlandıran digər sualları da cavablandırmışlar.

######