SİYASƏT
MİLLİ OLİMPİYA KOMİTƏSİNDƏ SEMİNAR
ARDNŞ-ın birinci vitse prezidenti, Milli Məclisin deputatı İlham Əliyev MOK-un prezidenti seçildikdən sonra Azərbaycanda idmanın inkişafında köklü dəyişikliklər baş vermişdir. İdmançılarımız beynəlxalq yarışlarda böyük uğurlar qazanmışlar ki, bu da bütün dünyada dövlətimizin nüfuzunun artmasına kömək edir. İlham Əliyev dəfələrlə bildirmişdir ki, Milli Olimpiya Komitəsinin məqsədi ölkədə idman kütləviliyinə nail olmaq və gəncləri idmana daha çox cəlb etməkdir. MOK prezidenti idmançıların hazırlanmasında bu məsələyə elmi baxımdan yanaşmağı və ən yaxşı beynəlxalq təcrübədən istifadə etməyi federasiya rəhbərlərinin qarşısında bir vəzifə olaraq qoymuşdur.
Avqustun 21-də Milli Olimpiya Komitəsinin inzibati binasında başlanmış seminar məhz bu məsələlərə, o cümlədən idmanın ağır atletika növünün problemlərinə həsr olunmuşdur.
Azərbaycanın Ağır Atletika Federasiyasının nümayəndələri, məşqçilər, idmançılar seminarda çıxış edərək bildirdilər ki, ağır atletika idmanın ən populyar növlərindən biridir. Beynəlxalq Ağır Atletika Federasiyasına 167 dövlət daxildir və BAAF bu göstərici üzrə idmanın yalnız 4 növündən geri qalır. Təsadüfi deyildir ki, XX əsrin 25 ən yaxşı idmançısının adı elan ediləndə, məşhur türk ağırlıq qaldıranı, Olimpiya çempionu Naim Süleymanoğlu da bu siyahıya daxil edilmişdir.
Budapeşt Universitetinin professoru Andres Sabonun çıxışı ağır atletlərin qidalanması məsələsinə həsr olunmuşdur. Onun sözlərinə görə, idmançıların hazırlanmasında bu məsələyə düzgün yanaşılması mühüm amillərdən biridir, çünki ağır atletlər məşqlər və yarışlar zamanı çoxlu enerji itirirlər və həmin enerjinin tezliklə bərpası üçün xüsusi qidalanma tələb olunur.
Seminar avqustun 23-də başa çatacaqdır.