MİLLİ QURTULUŞ GÜNÜ MÜNASİBƏTİLƏ UŞAQLAR ÜÇÜN BAYRAM ŞƏNLİYİ KEÇİRİLMİŞDİR
AZƏRTAC xəbər verir ki, Yasamal Uşaq və Gənclər Yaradıcılıq Mərkəzində 15 İyun - Milli Qurtuluş günü münasibətilə Türkiyənin Azərbaycandakı səfirliyinin dəstəyi, Yasamal Uşaq Təşkilatının təşəbbüsü ilə 100 qaçqın, əlil, kimsəsiz uşaqlar üçün bayram şənliyi keçirilmişdir.
Türkiyənin ölkəmizdəki səfiri Hulusi Kılıçın xanımı Günay Kılıç bayram münasibətilə uşaqları təbrik etmiş və onlara uğurlar arzulamışdır. Türkiyə-Azərbaycan dostluğundan danışan G.Kılıç vurğulamışdır ki, ölkələrimiz arasında olan isti münasibətlər bundan sonra da davam edəcəkdir.
15 iyunun tarixi əhəmiyyətini vurğulayan natiqlər bildirmişlər ki, ümummilli lider Heydər Əliyev hakimiyyətə qayıtdıqdan sonra dövlətimizin dağılmasının qarşısını almaq, respublikada siyasi və ictimai sabitliyi, ölkə iqtisadiyyatının dinamik yüksəlişini təmin etmək mümkün olmuşdur.
Bayram şənliyində səfirin xanımına balacaların əl işləri hədiyyə edildikdən sonra uşaqların iştirakı ilə ədəbi-bədii kompozisiya göstərilmişdir. Milli geyimli qızların ifa etdikləri rəqslər xoş ovqat yaratmışdır.
Sonda uşaqlara paltar, ayaqqabı və başqa hədiyyələr paylanmışdır.
Bölmənin digər xəbərləri
