MİNGƏÇEVİRDƏ 15 İYUN – MİLLİ QURTULUŞ GÜNÜ QEYD OLUNMUŞDUR
AZƏRTAC xəbər verir ki, 15 İyun - Milli Qurtuluş günü münasibətilə Mingəçevir şəhərində bir sıra tədbir keçirilmişdir.
Mingəçevirdəki Heydər Əliyev Muzeyinin qarşısında inşa edilmiş musiqili fəvvarənin və yeni salınmış parkın açılışı olmuşdur. Milli ornamentlə bəzədilmiş və lazer effektləri ilə müşayiət olunan fəvvarədə milli musiqilərimiz səslənir, xüsusi lazer qurğularının köməyi ilə Azərbaycan filmlərindən parçalar, milli atributların təsvirləri nümayiş etdirilir.
Uzunluğu 35, eni 15 metr olan bu fəvvarə respublikada ən böyük musiqili fəvvarədir.
Şəhərin mərkəzində 1 hektar ərazisi olan yaşıllıq zolağında yeni ağaclar, gül kolları əkilmiş, oturacaqlar, işıqlandırma qurğuları təzələnmiş, daş piltələr döşənmiş, ot örtüyü dəyişdirilmişdir. Yenidən qurulan parka Heydər Əliyevin adı verilmiş və orada şəhər sakinlərinin istirahəti üçün hər cür şərait yaradılmışdır.
Milli Qurtuluş günü ərəfəsində mingəçevirlilərin ixtiyarına verilən park və musiqili fəvvarənin açılışında “Azərenerji” ASC-nin prezidenti Etibar Pirverdiyev, Mingəçevir Şəhər İcra Hakimiyyətinin başçısı Mübariz Ağayev, Milli Məclisin deputatı Aydın Mirzəzadə iştirak etmişdir.
Sonra qonaqların iştirakı ilə YAP Mingəçevir şəhər təşkilatının hesabat yığıncağı keçirilmişdir. Çıxışlarda partiyanın gördüyü işlərdən, əldə edilən nailiyyətlərdən, qarşıda duran vəzifələrdən və oktyabrda keçiriləcək prezident seçkilərinə hazırlıqdan bəhs olunmuşdur.
Bayram münasibətilə konfrans iştirakçılarını təbrik edən natiqlər Azərbaycanda anarxiyanın, özbaşınalığın baş alıb-getdiyi bir dövrdə xalqın təkidli tələbi ilə ikinci dəfə hakimiyyətə qayıdan və milləti dəhşətli faciələrdən qurtaran görkəmli dövlət xadimi Heydər Əliyevin xilaskarlıq missiyasından, yüksək idarəçilik bacarığından söz açmışlar. Bildirilmişdir ki, 15 İyun - Milli Qurtuluş günü ilə başlanan sosial-iqtisadi inkişaf, tərəqqi hazırda Prezident İlham Əliyev tərəfindən uğurla və inamla davam etdirilir.
Bayram günü Heydər Əliyev meydanında ölkənin tanınmış incəsənət ustalarının iştirakı ilə konsert olmuşdur.
