MİNGƏÇEVİRDƏ “AZƏRBAYCAN XALQ CÜMHURİYYƏTİ TARİXİ ZƏRURƏTDƏN YARANMIŞDI” MÖVZUSUNDA KONFRANS KEÇİRİLMİŞDİR
AZƏRTAC xəbər verir ki, Azərbaycan Xalq Cümhuriyyətinin 90 illik yubileyi münasibətilə Mingəçevir şəhərinin idarə və təşkilatlarında, təhsil ocaqlarında görüşlər, toplantılar keçirilmişdir. Mİngəçevir Dövlət Dram Teatrında bədii kompozisiyalar, səhnəciklər, gənclərin rəsmlərindən ibarət sərgilər nümayiş olunmuşdur. Şəhər məktəbliləri arasında futbol yarışı keçirilmişdir.
Mingəçevir Şəhər İcra Hakimiyyətində “Azərbaycan Xalq Cümhuriyyəti tarixi zərurətdən yaranmışdı” mövzusunda keçirilən konfransda çıxış edənlər uzun illər müstəqillik arzusu ilə yaşayan xalqımızın 1918-ci il mayın 28-də qurduğu dünyəvi və demokratik dövlətin fəaliyyətindən danışmışlar. Qısa müddətdə formalaşan, bütün dövlət atributlarını təsis edən və bir çox sahələrlə bağlı qanunvericilik bazası yaradan xalq cümhuriyyətinin çətin və şərəfli yol keçməsindən söz açan natiqlər bildirmişlər ki, cəmi 23 ay yaşayan müstəqil dövlətimizin fəaliyyətinə həmişə yüksək qiymət verən ulu öndər Heydər Əliyevin gərgin əməyi sayəsində bu gün Azərbaycan Respublikası dünya ölkələri arasında böyük nüfuz sahibi olmuşdur. Qısa ömür sürən Azərbaycan Xalq Cümhuriyyətinin ideyaları yalnız dahi şəxsiyyət Heydər Əliyevin ikinci dəfə hakimiyyətə qayıdışından sonra reallaşmağa başlamışdır. Məruzələrdən sonra mövzu ətrafında müzakirələr aparılmış, iştirakçıları maraqlandıran suallar cavablandırılmışdır.
Mingəçevir şəhərindəki Heydər Əliyev meydanında 28 May - Respublika günü münasibətilə bayram konserti olmuşdur.
Bölmənin digər xəbərləri
