Mingəçevir, 24 sentyabr (AZƏRTAC). Mərkəzi Seçki Komissiyasının (MSK) təşkilatçılığı ilə artıq iki gündür ki, 47 saylı Mingəçevir seçki dairəsi üzrə dairə seçki komissiyasının üzvləri və məntəqə seçki komissiyalarının sədrləri üçün ixtisaslaşdırılmış kurslar keçirilir.

Prezident İlham Əliyevin “Azərbaycan Respublikasında insan hüquqlarının müdafiəsi üzrə Milli Fəaliyyət Planının təsdiq edilməsi haqqında” Sərəncamına uyğun olaraq keçirilən kurslarda Mingəçeviri və işğal olunmuş rayonları əhatə edən məntəqə seçki komissiyalarının sədrləri və DSK üzvləri olmaqla, ümumilikdə 60 nəfər iştirak edir.

Kurslarda şəhər icra hakimiyyətinin şöbə müdiri Sahib Əliyev “Seçici siyahılarının dəqiqləşdirilməsində yerli icra hakimiyyəti və bələdiyyə qurumlarının üzərinə düşən vəzifələr”, şəhər prokurorunun müavini Tağı Rüstəmov “Seçki hüquqlarının pozulmasına görə məsuliyyət”, şəhər məhkəməsinin hakimi İsbəndiyar Şəfiyev “Azərbaycan Respublikasının Konstitusiyası ilə verilən seçki hüquqları. Seçki Məcəlləsi haqqında əsas anlayış və prinsiplər, seçki hüququnun məhkəmə müdafiəsi” mövzularında məruzələr etmişlər.

Tədbirdə 47 saylı Mingəçevir seçki dairəsi dairə seçki komissiyasının sədri Oqtay Məmmədov seçkilərlə bağlı dairə və məntəqə seçki komissiyalarının vəzifələri barədə seminar iştirakçılarına məlumat vermiş, onların suallarını cavablandırmışdır.

Kurslar sentyabrın 25-də başa catacaqdır.

Kursların sonuncu günündə MSK-nın nümayəndəsi seçki komissiyalarında kargüzarlığın aparılması qaydaları, seçkilərə hazırlıq prosesi, vətəndaşların seçki hüquqlarının qorunması, seçkilər keçirilən zaman müşahidəçilərin hüquq və vəzifələri, seçkilərin nəticələrinin elan edilməsi və digər məsələlər barədə iştirakçılara ətraflı məlumat verəcəkdir.