Aprelin 22-də Rusiya Federasiyasının Prezidenti yanında Rusiya Dövlət Qulluğu Akademiyasında Rusiya Federasiyası ilə Azərbaycan Respublikası arasında diplomatik münasibətlər yaradılmasının on illiyinə həsr olunmuş “Rusiya-Azərbaycan münasibətləri: imkanlar və perspektivlər” mövzusunda elmi-praktik konfrans keçirilmişdir. Konfransı Ümumrusiya Azərbaycan Konqresi /ÜAK/ və Rusiya Dövlət Qulluğu Akademiyasının xarici siyasət fəaliyyəti kafedrası təşkil etmişdir. 

Azərbaycan Respublikasının Rusiya Federasiyasındakı səfiri Ramiz Rizayev konfrans iştirakçılarını salamlayaraq, dövlətlərimiz arasında münasibətlərin səviyyəsini yüksək qiymətləndirdi. Səfir dedi ki, dövlətlərarası münasibətlərimiz strateji tərəfdaşlıq səviyyəsinə qalxmışdır və hüquq bərabərliyi, qarşılıqlı hörmət prinsipləri əsasında inkişaf edir. O vurğuladı ki, əməkdaşlığımız yaradılmış hüquqi bazaya, o cümlədən imzalanmış 70-ə yaxın müqavilə və sazişə əsaslanır. Onların ən önəmlisi 1997-ci ildə imzalanmış “Dostluq, əməkdaşlıq və qarşılıqlı təhlükəsizlik haqqında müqavilə”dir. R.Rizayev Rusiya və Azərbaycan prezidentlərinin uğurlu qarşılıqlı səfərlərini xüsusi vurğulayaraq dedi ki, bu səfərlər getdikcə genişlənən dövlətlərarası münasibətlərin inkişafına və möhkəmlənməsinə yeni təkan vermişdir. Səfir daha sonra Azərbaycanın xarici işlər naziri Vilayət Quliyevin konfrans iştirakçilarına təbrik məktubunu oxudu. Məktubda Azərbaycanın Rusiya ilə tərəfdaşlıq münasibətlərini daha da möhkəmləndirmək və inkişaf etdirmək niyyətində olduğu bildirilir.

Rusiya XİN-in 4-cü MDB Departamentinin direktoru Aleksey Borodavkin konfransda çıxış edərək, Rusiyanın xarici işlər naziri İqor İvanovun xoş arzularını yetirdi və bildirdi ki, Rusiya Azərbaycanla bütün sahələrdə əməkdaşlığa maraq göstərir. O dedi ki, son iki ildə münasibətlərimiz, həqiqətən, keyfiyyətcə yeni səviyyəyə qalxmışdır və bütün sahələrdə strateji tərəfdaşlığın yüksək səviyyəsindən danışmağa əsas var. A. Borodavkin vurğuladı ki, indi iki prezidentin yayda keçiriləcək görüşünə hazırlıq görülür və bu görüş zamanı qarşılıqlı fəaliyyətin konkret proqramları müəyyənləşdiriləcək və dövlətlərarası münasibətlərin dərinləşdirilməsinə yeni təkan veriləcəkdir.

Konfransda Rusiya-Azərbaycan Dostluğu Cəmiyyətinin prezidenti Nikolay Baybakov, Rusiya Xalqları Assambleyasının sədri, Dövlət Dumasının deputatı Ramazan Abdulatipov, Rusiya Dövlət Qulluğu Akademiyası xarici siyasət fəaliyyəti kafedrasının müdiri Vyaçeslav Mixaylov, politoloqlar, tarixçilər, Azərbaycan XİN-in müşaviri Elman Zeynalov, ÜAK-ın prezidenti Məmməd Əliyev, Moskvada nəşr edilən “Voprosı istorii” jurnalının baş redaktoru Əhməd İsgəndərov və Azərbaycan ziyalılarının digər nümayəndələri iştirak edirdilər.

Asya Hacızadə

AZƏRTAC-ın xüsusi müxbiri

Moskva