AZƏRTAC-ın müxbirləri xəbər verirlər ki, fevralın 22-də Moskvada, Rusiya hökumətinin Qəbullar evində MDB üzvü olan ölkələrin dövlət başçılarının qeyri-rəsmi zirvə toplantısı keçirilmişdir. Azərbaycan Prezidenti İlham Əliyev zirvə toplantısının işində iştirak etmişdir.

Zirvə toplantısı başlanmazdan əvvəl Rusiya Federasiyasının Prezidenti Vladimir Putin Prezident İlham Əliyevi və digər MDB ölkələrinin dövlət başçılarını səmimiyyətlə qarşıladı. Zirvə toplantısının iştirakçıları xatirə şəkli çəkdirdilər.

Yüksək səviyyəli görüşü Rusiya Prezidenti Vladimir Putin açdı, bu sammitin işində iştirak etdiklərinə görə Birlik dövlətlərinin başçılarına təşəkkürünü bildirdi.

Sonra Birliyin sədri, Qırğızıstan Prezidenti Kurmanbek Bakiyev çıxış edərək, MDB ölkələrinin hamısı üçün maraq doğuran məsələlərin müzakirə olunmasını təklif etdi.

Rusiya Prezidenti Vladimir Putin MDB-nin inkişafının vəziyyətinə həsr olunmuş məruzə ilə çıxış etdi. O bildirdi ki, Birlik ölkələri ilə əməkdaşlıq Rusiyanın xarici siyasətinin prioritet istiqamətidir. RF Prezidenti vurğuladı ki, MDB-nin gələcək inkişafı konsepsiyasının qəbul edilməsi, iqtisadi və humanitar sahələrdə müştərək layihələrin həyata keçirilməsi Birliyin möhkəmlənməsinə yönəlmiş zəruri amildir.

MDB Ölkələri Miqrasiya orqanlarının rəhbərləri Şurasının işinin fəallaşdırılması məsələsinə toxunan Prezident Putin Birlik ölkələrindən gələn miqrantlara münasibətdə mövcud olan ksenofobiya və millətçilik faktlarından təəssüfləndiyini bildirdi.

Rusiya dövlətinin başçısı humanitar əməkdaşlığın genişləndirilməsinin əhəmiyyətini vurğulayaraq, təhsil sahəsində layihələrə daha çox diqqət yetirməyin zəruri olduğunu söylədi. O, Azərbaycan Prezidenti İlham Əliyevin Bakıda M.V.Lomonosov adına Moskva Dövlət Universitetinin filialının açılması barədə qərarını yüksək qiymətləndirdi. Rusiya Prezidenti Vladimir Putin dedi: “Dünən həmkarımız, dostum Azərbaycan Prezidentindən Bakıda Moskva Dövlət Universitetinin filialının açılması barədə razılıq əldə edilməsini eşitmək mənim üçün çox xoş oldu”.

Rusiya 2008-ci ili Ədəbiyyat və mütaliə ili elan etmək təşəbbüsü ilə çıxış etdi. İl çərçivəsində milli ədəbiyyatların klassiklərinin, o cümlədən Azərbaycan şairi Mikayıl Müşfiqin yubileyinin keçirilməsi planlaşdırılır.

Rusiya dövlətinin başçısı Birlik ölkələri xalqlarının bədii ədəbiyyat əsərlərinin rus dilinə tərcüməsi prosesini fəallaşdırmağı da təklif etdi. Prezident Vladimir Putin MDB-də sədarət təsisatının konsepsiyasının qəbul edilməsinə tərəfdar olduğunu bildirdi. Onun fikrincə, bu sənəd Birlik strukturlarının işini fəallaşdırmağa imkan verəcəkdir.

Rusiya Prezidenti MDB çərçivəsində əməkdaşlığa, bu işə müsbət yanaşdıqlarına görə öz həmkarlarına təşəkkür etdi.

Rusiya Prezidenti vəzifəsində sonuncu zirvə toplantısında iştirak edən Vladimir Putin özünün siyasi varisini MDB ölkələrinin dövlət başçılarına təqdim etdi. O xüsusi vurğuladı ki, “hökumət sədrinin birinci müavini Dmitri Medvedev prezident seçkilərində qalib gələcəyi təqdirdə Rusiyanın MDB-yə münasibətdə xarici siyasəti dəyişməyəcəkdir”.

RF hökuməti sədrinin birinci müavini Dmitri Medvedev Birliyin inkişaf perspektivləri barədə məruzə ilə çıxış etdi.

Sonra müzakirələr başlandı. Zirvə toplantısının iştirakçıları MDB-nin üzvü olan dövlətlərin iqtisadi və siyasi əməkdaşlığının aktual məsələlərini, sosial və humanitar sahələrdə müştərək layihələrin həyata keçirilməsində onların qarşılıqlı əlaqələrini, MDB-nin gələcək inkişaf konsepsiyasının həyata keçirilməsinə dair tədbirləri, eləcə də Birliyin fəaliyyətinin səmərəsini artırmağın və onun strukturlarının işini optimallaşdırmağın konkret yollarını nəzərdən keçirdilər. Birlik məkanında miqrasiya siyasəti, üzv dövlətlərin nəqliyyat sahəsində qarşılıqlı fəaliyyəti, o cümlədən nəqliyyat infrastrukturunun hərtərəfli inkişafı və modernləşdirilməsi məsələləri də müzakirə edildi. Sonuncu mövzunun aktuallığı ondan irəli gəlir ki, Qazaxıstanın təşəbbüsü ilə 2008-ci il MDB-də Nəqliyyat ili elan edilmişdir. Müzakirə olunan digər mühüm mövzular arasında Böyük Vətən müharibəsində Qələbənin 65-ci ildönümünün bayram edilməsinə hazırlıqla əlaqədar əsas tədbirlər planının layihəsinin işlənib hazırlanması, eləcə də MDB-nin ümumi informasiya məkanının yaradılması üçün “Mir” dövlətlərarası teleradio şirkətinin imkanlarından fəal istifadə edilməsi məsələləri də vardı. 

X X X

Zirvə toplantısı başa çatandan sonra Rusiya Prezidenti adından MDB-nin üzvü olan ölkələrin dövlət başçılarının şərəfinə ziyafət verildi.

Elə həmin gün axşam zirvə toplantısının iştirakçıları Dövlət Kreml sarayında Vətənin müdafiəçiləri günü şərəfinə konsertdə olmuşlar.

######