MOSKVADA “NEFT” KİTABI ÇAPDAN ÇIXMIŞDIR
AZƏRTAC-ın xüsusi müxbiri xəbər verir ki, Moskvada, “Populyarnaya literatura” nəşriyyatında çapdan çıxmış “Neft” kitabı böyük uğur qazanmışdır.
Marina Yudeniçin siyasi romanı sənədli materiallar və əslində, hadisələrin içində olmuş müəllifin şəxsi müşahidələri əsasında yazıldığı üçün geniş oxucu auditoriyası toplamışdır. Yazıçı, hüquqşünas, psixoloq və polittexnoloq Marina Yudeniç Moskva Dövlət Hüquq Akademiyasını və Fransanın Sorbonna Universitetini bitirmişdir. 1994-1995-ci illərdə RF Prezidenti Administrasiyasının informasiya idarəsi rəisinin müavini işləmiş M.Yudeniç televiziya və radioda müəllif verilişləri aparmışdır. 1995-1996-cı iillərdə RF prezidenti Boris Yeltsinin mətbuat xidmətinin başçısı olmuşdur. Mistik elementlərin yer aldığı psixoloji detektiv janrında 13 kitabın müəllifidir.
“Neft” kitabında keçid dövründə Rusiyada baş verən siyasi hadisələrdən, ölkə tarixinin dönüş mərhələsində xarici dövlətlərin rolundan danışılır. “Vaxt gələcək və tarixçilər XX əsrin axırını neft uğrunda mübarizə dövrü adlandıracaqlar” - fikrini diqqətə çəkən müəllif hesab edir ki, həmin dövrdə Rusiya siyasi şantaj və terror obyektinə çevrilmişdi. Təbii sərvətləri müəmmalı şəkildə beynəlxalq korporasiyaların və ayrı-ayrı şəxslərin mülkiyyətinə keçmiş Rusiya böyük dövlət statusunu saxlamaq, yaxud Avropanın ucqarında aqrar ölkəyə çevrilmək seçimi qarşısında qalmışdı.
Bölmənin digər xəbərləri
