Narkoloji qeydiyyat barədə arayışı “ASAN xidmət” verəcək
Bakı, 3 iyun, AZƏRTAC
“Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025–2030-cu illər üçün Dövlət Proqramı”nın həyata keçirilməsi üzrə Tədbirlər Planının 8.2.3-cü yarımbəndinə uyğun olaraq, Azərbaycan Respublikasının vətəndaşlarına, əcnəbilərə və vətəndaşlığı olmayan şəxslərə narkotik istifadəçisi kimi qeydiyyatda olub-olmaması barədə arayışların verilməsi prosesinin sadələşdirilməsi məqsədilə müvafiq xidmət “ASAN xidmət” tərəfindən həyata keçiriləcək.
AZƏRTAC xəbər verir ki, bununla bağlı Prezident İlham Əliyev “Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin fəaliyyətinin təmin edilməsi haqqında” Azərbaycan Respublikası Prezidentinin 2012-ci il 5 sentyabr tarixli 706 nömrəli Fərmanında dəyişiklik edilməsi barədə” Fərman imzalayıb.
Dəyişikliyə əsasən, Fərmanın 1-ci hissəsinin 5.24.4-cü yarımbəndindən sonra yeni 5.25-ci bənd əlavə edilib. Yeni müddəaya uyğun olaraq, şəxsin dövlət narkoloji tibb müəssisələrində qeydiyyatda olmasına dair arayışın verilməsi xidməti “ASAN xidmət” tərəfindən göstəriləcək.
Qeyd olunan dəyişiklik vətəndaşlara göstərilən xidmətin daha operativ şəkildə həyata keçirilməsinə və müraciət prosedurlarının sadələşdirilməsinə ikman verir.
Bölmənin digər xəbərləri
