NATO BAŞ KATİBİNİN İCTİMAİ DİPLOMATİYA MƏSƏLƏLƏRİ ÜZRƏ MÜAVİNİ AZƏRBAYCANA GƏLƏCƏKDİR
Xarici İşlər Nazirliyinin mətbuat xidmətindən AZƏRTAC-a bildirmişlər ki, “NATO həftəsi” çərçivəsində iyunun 24-dən 25-dək qurumun baş katibinin ictimai diplomatiya məsələləri üzrə müavini Jan Fransua Büro Azərbaycana səfər edəcəkdir.
Ölkəmizə ilk səfəri çərçivəsində baş katibin köməkçisi Avroatlantik Mərkəzlə tanış olacaq, NATO-nun İctimai Diplomatiya Bölməsinin dəstəyi ilə Avrasiya Hüquqşünaslar Assosiasiyası tərəfindən təşkil ediləcək “Azərbaycanın Avroatlantik regiona inteqrasiyası və demokratik seçkilər” mövzusunda keçiriləcək konfransda çıxış edəcəkdir. Qonaq həmçinin, keçmiş sovet ordusundan qalmış raket yanacağının məhv edilməsini nəzərdə tutan “Melanj” layihəsinin yekunlaşdırılması ilə bağlı seminarda da iştirak edəcək və bir sıra dövlət rəsmiləri ilə görüşlər keçirəcəkdir.
Jan Fransua Büronun Avroatlantik Mərkəzdə kütləvi informasiya vasitələri nümayəndələri ilə görüşü də nəzərdə tutulmuşdur.
Bölmənin digər xəbərləri
