NATO-NUN BAŞ KATİBİ KİYEVDƏ MƏTBUAT KONFRANSI KEÇİRMİŞDİR
AZƏRTAC-ın xüsusi müxbiri xəbər verir ki, Ukraynada səfərdə olan NATO-nun baş katibi Yaap de Hoop Sxeffer iyunun 17-də Kiyevdə mətbuat konfransı keçirmişdir.
O, son vaxtlar yayılmaqda olan çoxsaylı əfsanələr əsasında deyil, informativ diskussiya aparmağı təklif etmişdir. Alyansın baş katibi NATO bazalarının Ukrayna ərazisində yerləşdiriləcəyi, Ukrayna hərbçilərinin NATO əməliyyatlarında iştirakı, habelə alyansın hərbi dəniz bazalarının Ukraynada yerləşdiriləcəyi barədə söz-söhbətləri əfsanə adlandırmışdır. O vurğulamışdır ki, bütün bunlar həqiqətə uyğun deyildir.
Y.Sxeffer bildirmişdir ki, Ukraynanın NATO kimi demokratik ölkələr ailəsinə daxil olması onun suverenliyini möhkəmləndirəcəkdir. Alyansa daxil olan ölkələrin səfirlərindən ibarət nümayəndə heyəti hazırda Lvov, Xarkov və Dnepropetrovskda səfərdədirlər və ukraynalılarla görüşürlər.
NATO-nun baş katibi dekabrda Ukraynanın alyansa üzvlüyə dair fəaliyyət planına qoşulması üçün maksimum səy göstərməyə hazır olduğunu söyləmişdir.
Y.Sxeffer Ukraynanın göstərilən vaxtda bu plana qoşula bilib-bilməyəcəyini proqnozlaşdırmaqdan çəkinmişdir.
Bölmənin digər xəbərləri
