Naxçıvan, 2 iyun, AZƏRTAC

Azərbaycan Respublikasının Prezidenti İlham Əliyevin rəhbərliyi ilə ölkəmizdə, o cümlədən Naxçıvan Muxtar Respublikasında mülki aviasiya sisteminin müasirləşdirilməsi istiqamətində atılan addımlar nəticəsində bu sahənin inkişafı təmin olunub.

AZƏRTAC-ın Naxçıvan bürosu xəbər verir ki, 2004-cü ilin aprel ayında hava limanına Beynəlxalq Hava Limanı statusu verilib. Son illər həyata keçirilən kompleks quruculuq tədbirləri Naxçıvan Beynəlxalq Hava Limanını yeni inkişaf mərhələsinə çıxarıb. Dövlətimizin başçısının iştirakı ilə 2014-cü ildə hava limanının yeni inzibati binası, 2015-ci ildə isə “Şərq Terminalı” istifadəyə verilib.

2016-cı ildə Naxçıvan Muxtar Respublikası Ali Məclisinin Sədri Vasif Talıbovun iştirakı ilə hava limanının “Qərb Terminalı” istifadəyə verilib. Həm “Şərq”, həm də “Qərb” terminallarının yenidən qurulması zamanı Beynəlxalq Mülki Aviasiya təşkilatının, Beynəlxalq Mülki Nəqliyyat Assosiasiyasının tələb və tövsiyələrinə cavab verən, Azərbaycan Respublikasında istifadəsinə icazə verilmiş ən müasir texnologiyalardan, uçuşların və aviasiya təhlükəsizliyini təmin edən avadanlıqlardan istifadə olunub. Hava limanında ilk dəfə teleskopik traplar qurulub. Aerovağzal kompleksinin yenidən qurulması illik sərnişin dövriyyəsinin və yükdaşımaların artırılmasında mühüm rol oynayıb, hava limanının saatlıq sərnişin dövriyyəsi 300 nəfərdən 600 nəfərə çatdırılıb. Hər iki terminalda beynəlxalq səviyyəli uçuşların həyata keçirilməsi üçün sərhəd nəzarəti, tranzit sərnişinlər üçün zal, Aviasiya təhlükəsizliyi nəzarəti sahələri fəaliyyət göstərir.

Muxtar respublikanın sosial-iqtisadi inkişafı, turizm imkanlarının genişlənməsi hava nəqliyyatına tələbatı da artırıb. Hava limanında əhaliyə və turistlərə hərtərəfli xidmət göstərmək üçün lazımlı şərait yaradılıb, infrastruktur təkmilləşdirilib. Həyata keçirilən işlərin tərkib hissəsi olaraq Naxçıvan, Ordubad, Şərur və Şahbuz şəhərlərində müasir aviakassa binaları tikilib istifadəyə verilib, sərnişinlərin rahatlığı və xidmətin səviyyəsi yüksəldilib. Xidməti personalın bilik səviyyəsinin yüksəldilməsi, müasir texnoloji avadanlıqlardan istifadə qaydaları və onların tətbiq edilməsi üçün də tədbirlər görülüb, əməkdaşlar Azərbaycanda və xarici ölkələrdə təşkil olunmuş ixtisasartırma kurslarında iştirak edərək yerli və beynəlxalq dərəcəli sertifikatlarla təmin olunublar.

Beynəlxalq Mülki Aviasiya Təşkilatının qəbul etdiyi qərara əsasən 2019-cu il avqust ayının 15-dən Naxçıvan Muxtar Respublikasına Türkiyə üzərindən birbaşa hava dəhlizi açılıb. Yeni hava dəhlizinin açılması muxtar respublika üçün bir çox cəhətdən əhəmiyyətlidir. İlk növbədə, Naxçıvan Muxtar Respublikasının bu hava dəhlizi vasitəsilə Türkiyə üzərindən beynəlxalq dəhlizlərə çıxışı təmin edilir. Türkiyə üzərindən yeni açılan hava dəhlizi gələcəkdə yeni beynəlxalq reyslərin açılmasına şərait yaradır.

2021-ci ildə dövlət başçısının iştirakı ilə açılışı olan Naxçıvan Beynəlxalq Hava Limanının yeni uçuş-enmə zolağının ümumi uzunluğu 3300, eni 60 metrdir. Yükgötürmə qabiliyyəti 400 ton olan zolağın salınması zamanı yerli iqlim şəraiti və beynəlxalq tələblər nəzərə alınıb. Uçuş-enmə zolağının naviqasiya və işıqlandırma sistemləri müasir səviyyədə qurulub. Ərazidə peyk siqnallarını tənzimləyən yerüstü naviqasiya sistemləri, çətin hava şəraitində təyyarələrin təhlükəsiz qəbulu, uçuşu üçün avtomatlaşdırılmış meteoroloji radiolokator quraşdırılıb, radiorabitə vasitələri tamamilə yenilənib. Bu da yerli və beynəlxalq dəhlizlər üçün hava şəraiti haqqında məlumatların operativ və dəqiq ötürülməsinə imkan verir. Bu uçuş-enmə zolağı ağırtonlu yük təyyarələrinin Naxçıvan Beynəlxalq Hava Limanına qəbulunu təmin edir, həmçinin sərnişin dövriyyəsinin artmasına da müsbət təsir göstərir. Hazırda hava limanında saatlıq sərnişin dövriyyəsi 600 nəfərdən çoxdur.

Ötən il Naxçıvan Beynəlxalq Hava Limanı Naxçıvan Muxtar Respublikası Nazirlər Kabinetinin tabeliyinə verilib, Naxçıvan Beynəlxalq Hava Limanının yeni əsasnaməsi təsdiq edilib. Bundan sonra hava limanı yeni əsaslarla fəaliyyət göstərəcək.

Naxçıvan Beynəlxalq Hava Limanında yerüstü xidmət dünya standartlarına cavab verir. Beynəlxalq normaların tələblərinə uyğun fəaliyyət göstərən yük terminalının mövcud olması hava limanının əhəmiyyətini xeyli artırır. Hazırda Naxçıvan Beynəlxalq Hava Limanından Bakı, Gəncə, Moskva və İstanbul şəhərlərinə, ümumilikdə, 4 istiqamətdə uçuşlar həyata keçirilir. Hava limanı il ərzində 320 mindən çox sərnişinə xidmət edir. Uçuşlar dünyada istismar olunan müasirtipli hava gəmiləri vasitəsilə yerinə yetirilir. Hava nəqliyyatının inkişafı və hava daşımalarının müasir tələblər səviyyəsində qurulması üçün ardıcıl tədbirlərin görülməsi, uçuşların təhlükəsizliyini artırmaq məqsədilə alınmış yeni maşın və mexanizmlərin yüksək texniki göstəricilərə malik olması sərnişinlərə nümunəvi xidmət göstərməyə imkan verir. Gələcəkdə də uçuşların əhatə dairəsinin genişləndirilməsi üzrə xüsusi planların işlənib hazırlanması nəzərdə tutulub.

Sərnişin rahatlığı üçün 2021-ci ildə “Aeroport taksi” xidməti yaradılıb. Həmçinin hava limanı ərazisində “Çinar Kafe” fəaliyyət göstərir. Əlverişsiz hava şəraitində sərnişinlərin rahatlığını təmin etmək üçün “Qərb” və “Şərq” terminallarının qarşısında talvarın tikintisi artıq yekunlaşmaq üzrədir. Hava nəqliyyatı sisteminin inkişafına xüsusi diqqət göstərən Naxçıvan Muxtar Respublikası Ali Məclisinin Sədri Vasif Talıbov deyib: “Muxtar respublikada hava nəqliyyatının inkişafı sahəsində həyata keçirilən tədbirlərin əsas məqsədi sərnişinlərin rahatlığını təmin etməkdir”.

Göstərilən dövlət qayğısı, yaradılan hərtərəfli şərait Naxçıvan Beynəlxalq Hava Limanının kollektivinin hər il 2 iyun - Mülki Aviasiya İşçilərinin Peşə Bayramı Gününü yeni-yeni uğurlarla qeyd etməsinə imkan verir.