İQTİSADİYYAT
Naxçıvan Beynəlxalq hava limanının maddi-texniki bazası möhkəmləndirilir
Naxçıvan, 10 oktyabr (AZƏRTAC). Naxçıvan Muxtar Respublikasında nəqliyyat infrastrukturunun möhkəmləndirilməsi ilə bağlı mühüm tədbirlər görülür. Bu tədbirlərin davamı kimi Naxçıvan Beynəlxalq hava limanı üçün müxtəlif təyinatlı yeni maşın-mexanizmlər alınıb gətirilmişdir.
AZƏRTAC xəbər verir ki, Naxçıvan Muxtar Respublikası Ali Məclisinin sədri Vasif Talıbov yeni maşın-mexanizmlərə baxmışdır.
Məlumat verilmişdir ki, təyyarə yanacağı daşıyan “MAN” markalı ağırtonnajlı avtomobil 28, “Mercedes Benz” markalı avtomobil isə 20 tonluqdur. Sərnişinlərin rahatlığı üçün nəzərdə tutulan “Abus-6300” markalı yeni avtobus 124 nəfərlikdir. Avtobus vasitəsilə sərnişinlər təyyarədən perrona və əks istiqamətə daşınacaqlar. Avtobusda əlillər üçün də xüsusi yerlər vardır. Hava limanında yeni gətirilmiş “ISUZU” markalı avtotrap və avtokonveyner, yük terminalı üçün 1 ədəd yük avtoqaldırıcısı, “Timson” markalı traktor və 10 ədəd traktor qoşqusu, 2 “Fiat” markalı avtomobil və 1 ədəd “Hobart” tipli xüsusi aqreqat da yüksək texniki göstəricilərə malikdir.
Bildirilmişdir ki, Naxçıvan Beynəlxalq hava limanında uçuşların təhlükəsizliyinin təmin olunması məqsədilə bütün elektrik-işıq sistemi, rabitə qurğuları baxışdan keçirilmiş, istifadə olunan maşın-mexanizmlər qış mövsümü üçün əsaslı təmir edilərək saz vəziyyətə gətirilmişdir.
Naxçıvan Beynəlxalq hava limanında yaradılan şərait və ən son texnoloji nailiyyətlərin tətbiqi burada saatda 300 sərnişinə xidmət göstərməyə imkan verir. Sərnişinlərə xidmətin səviyyəsinin yüksəldilməsi istiqamətində həyata keçrilən tədbirlərin davamı kimi, hava limanında yeni VİP salonu fəaliyyət göstərəcəkdir.
Ali Məclisin sədri yeni VİP salonuna baxmış, burada yaradılan yüksək şəraitlə tanış olmuşdur. Vasif Talıbov VİP salonuna Naxçıvan-Culfa magistralından yeni yolun çəkilməsi, ərazidə avtomobil dayanacaqlarının yaradılması, ətrafda yaşıllaşdırma işlərinin aparılması barədə tapşırıqlar vermişdir.
* * *
Naxçıvan Muxtar Respublikası Ali Məclisinin sədri Vasif Talıbov Naxçıvan-Culfa magistralının hava limanı qovşağında aparılan yenidənqurma işlərinin gedişi ilə maraqlanmışdır.
Məlumat verilmişdir ki, hazırda hava limanı qovşağında yol genişləndirilir, ətrafdakı yamaclara beton lövhələr qoyularaq möhkəmləndirilir, yaşıllaşdırma tədbirlərinin görülməsi üçün işlər aparılır. Burada Naxçıvan şəhərinə şərq istiqamətdən giriş qapısının inşa olunması da nəzərdə tutulur. Yenidənqurma işlərindən sonra yolda avtomobillərin 4 zolaq üzrə rahat hərəkəti mümkün olacaq, ətrafda müasir işıqlandırma sistemləri quraşdırılacaqdır.
Hava limanı qovşağından Naxçıvançay üzərindəki körpüyə qədər olan 600 metrlik yolun kənarlarında səkilər salınır, yolun Babək rayonun Şəkərabad kəndi ərazisindən keçən hissəsində hasar çəkilir, bardürlər düzülür.
Ali Məclisin sədri yolda yenidənqurma işlərinin gedişi ilə bağlı müvafiq tapşırıqlar vermişdir.
######