NAZİRLƏR KABİNETİNDƏ QƏBUL
İyulun 18-də baş nazir Artur Rasizadə xarici işlər nazirinin birinci müavini Sugiura Seyken başda olmaqla Yaponiya nümayəndə heyətini - “Böyük İpək Yolu” enerji missiyasını qəbul etmişdir.
Baş nazir qonaqları salamlayaraq bildirdi ki, Yaponiya nümayəndə heyətinin indiki səfəri ölkələrimiz arasında qarşılıqlı münasibətlər vəsiləsində mühüm addımdır. Missiyanın səfərinin qısamüddətli olmasına baxmayaraq, iqtisadi, siyasi və digər sahələrdə əlaqələrin inkişafına güclü təkan verəcək böyük iş görülmüşdür.
Artur Rasizadə dedi ki, ötən il Azərbaycanın müstəqilliyinin on ili tamam oldu. Məlumdur ki, müstəqillik elan etmək asan deyildir, lakin onu qoruyub saxlamaq daha çətindir. Ölkəmiz ilk illərdə bir çox çətinliklərlə üzləşdi və yalnız cənab Heydər Əliyev hakimiyyətə qayıtdıqdan sonra sabitliyi bərqərar etmək mümkün oldu. 1994-cü ildə “Əsrin müqaviləsi” imzalandı və dövlətimiz neft sektoru əsasında iqtisadi inkişafa başladı. Azərbaycan demokratik inkişaf və beynəlxalq təşkilatlara inteqrasiya yolunu seçmişdir. Sabit inkişaf öz bəhrələrini vermişdir. Beynəlxalq maliyyə qurumlarının məlumatına görə, Azərbaycan bir çox göstəricilərə görə MDB ölkələri arasında birinci yerdə gedir.
Baş nazir ikitərəfli münasibətlərdən danışaraq bildirdi ki, Yaponiya şirkətləri Azərbaycana axırıncı gələnlərdən olsa da, bu gün iqtisadiyyatımıza daha çox vəsait qoyur və bir çox layihələrdə iştirak edirlər. Yaponiya şirkətlərinin enerji layihələrinin həyata keçirilməsində iştirakını sübut edən çoxlu misallar gətirmək olar. Lakin bunu iqtisadiyatın digər sahələri barədə demək olmaz. Artur Rasizadə iqtisadi əlaqələri inkişaf etdirmək üçün böyük imkanlar olduğunu da vurğuladı . O, ümidvar olduğunu bildirdi ki, səfərin yekunlarına əsasən yaradılan işçi qrupu fəal işləyəcək və konkret layihələr təklif edəcəkdir.
Yaponiya xarici işlər nazirinin birinci müavini Suqiura Seyken bildirdi ki, Böyük İpək Yolunda mühüm nəqliyyat qovşağı olan, zəngin tarixə və ənənələrə malik Azərbaycana gəlməsinə şaddır. O dedi ki, Azərbaycana Böyük İpək Yolunun enerji missiyasının başçısı kimi gəlmişdir. Missiyanın tərkibinə Yaponiya hökumətinin, işgüzar və elmi dairələrin nümayəndələri daxildir.
Qonaq bildirdi ki, Yaponiyanın sabiq baş naziri Haşimoto xüsusi “Böyük İpək Yolu diplomatiyası” proqramını elan etmişdir. Bu proqramda Yaponiyanın və Azərbaycanın mənafeləri üst-üstə düşür. Azərbaycan dünyanın iri neft şirkətlərinin iştirakı ilə Xəzər dənizinin ona məxsus olan sektorundakı zəngin neft və qaz yataqlarından istifadə edir. Bu layihələrə Yaponiya da fəal qoşulmuşdur.
Nümayəndə heyətinin başçısı bunu da əlavə etdi ki, Əfqanıstanda sabitlik bərqərar olandan sonra Yaponiya Cənubi Qafqaz ölkələrini Cənubi-Qərbi Asiya dövlətləri ilə iqtisadi cəhətdən birləşdirəcək boru kəmərinin çəkilişinə maraq göstərəcəkdir.
Qəbulda baş nazirin müavini Abid Şərifov, xarici işlər nazirinin müavini Xələf Xələfov, Yaponiyanın Azərbaycandakı səfiri Fucivara Toşiyuki iştirak edirdilər.
Bölmənin digər xəbərləri
