İQTİSADİYYAT
NEFTÇALADA İQTİSADİYYAT MÖHKƏMLƏNMİŞ, ƏHALİNİN RİFAHI YÜKSƏLMİŞDİR
Neftçala, 12 fevral (AZƏRTAC). Neftçala Rayon İcra Hakimiyyəti başçısı yanında şuranın geniş iclasında 2009-cu ildə sosial-iqtisadi inkişafın yekunları, cari ildə qarşıda duran vəzifələr ətraflı müzakirə olunmuşdur.
Tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri qoymuş, əziz xatirəsini ehtiramla yad etmişlər.
İclasda rayon icra hakimiyyətinin başçısı Taleh Qaraşov geniş məruzə ilə çıxış etmişdir. Bildirmişdir ki, 2009-cu ildə rayonda əsas makroiqtisadi göstərici olan ümumi məhsul istehsalının həcmi 2008-ci ilə nisbətən 0,8 faiz artmışdır. Hesabat dövründə 105,3 milyon manatlıq ümumi məhsul istehsal edilmişdir ki, bu da ötən ilin nəticələri ilə müqayisədə 0,8 milyon manat coxdur. Ümumi məhsulun tərkibində sənaye məhsulu 9427,6 min manat və ya ümumi məhsulun 9 faizi qədər, kənd təsərrüfatı məhsulu 56826,5 min manat və ya 53,9 faiz, nəqliyyat xidməti 1433,2 min manat və ya 1,4 faiz , rabitə xidməti 507,5 min manat və ya 0,5 faiz, ticarət, iaşə və digər xidmət sahələrinin həcmi 34032 min manat və ya 32,2 faiz olmuşdur.
Ümumi məhsulun həcmində qeyri-dövlət bölməsinin payı 95,6 faizə çatmışdır. Adambaşına 1340 manatlıq və ya 2008-cı ildəkindən 4,4 faiz cox məhsul istehsal edilmişdir.
Hesabat ilində rayonda 11 yeni müəssisə yaradılmış, 247 fiziki şəxs fəaliyyətə başlamışdır. Yeni yaradılmış müəssisələrin hesabına 30, fiziki şəxslər üzrə 247, mövcud idarə və təşkilatlarda isə 85 olmaqla cəmi 362 yeni daimi iş yeri acılmışdır. Kənd təsərrüfatında mövsumi işlərə 904 nəfər cəlb edilmişdir.
Bildirilmişdir ki, rayonun sənaye müəssisələrində, o cümlədən fiziki şəxslərin fəaliyyəti nəzərə alınmaqla 9427,6 min manatlıq sənaye məhsulu istehsal olunmuş, iş və xidmətlər yerinə yetirilmişdir. Sənayenin ümumi məhsulunda qeyri-dövlət bölməsinin xüsusi çəkisi 87,4 faiz olmuşdur. Sənaye məhsulunun ümumi həcmində mədənçıxarma sənayesi 56,5 faiz, emal sənayesi 30,9 faiz, elektrik enerjisi, qaz , suyun təchizatı və bölüşdurulməsi 12,6 faiz təşkil etmişdir.
İclasda diqqətə çatdırılmışdır ki, hesabat dövrundə əhalinin nominal pul gəlirləri 27754 min manat və ya əvvəlki illə müqayisədə 2,6 faiz artmışdır. Adambaşına düşən pul gəlirləri 1,4 faiz artaraq 353 manat olmuşdur. Hazırda rayon üzrə bir işçinin orta aylıq əmək haqqı 180 manat təşkil edir. Bu, 2008-ci ilin nəticələri ilə müqayisədə 2,9 faiz coxdur. İl ərzində əhaliyə 94,2 milyon manatlıq istehlak malları satılmış və xidmətlər göstərilmişdir. Pərakəndə əmtəə dövriyyəsi 28,2 faiz artaraq 82,8 milyon manata, pullu xidmətlərin həcmi 26,3 faiz çoxalaraq 11,4 milyon manata çatmışdır.
Məlumat verilmişdir ki, 2009-cu ildə rayon məşğulluq mərkəzi tərəfindən 314 nəfər işaxtaran vətəndaş daimi iş yerləri ilə təmin olunmuşdur. 64 nəfərə işsiz statusu verilərək işsizlik müavinəti təyin edilmiş, 19 vətəndaş peşə hazırlığı kursuna, 44 nəfər haqqı ödənilən ictimai işlərə cəlb edilmişdir.
Sahibkarlığın inkişafına dəstək məqsədi ilə rayonda fəaliyyət göstərən 3 bank və bir kredit təşkilatı tərəfindən ötən il özəl sektorda çalışanlara ümumilikdə 2 milyon 58,2 min manat kreditlər verilmişdir.
Bildirilmişdir ki, hesabat dövrundə rayonun 3 nərəbalıqartırma zavodu tərəfindən 6,7 milyon ədəd nərə balığı körpələri yetişdirilərək Kur çayı vasitəsilə Xəzər dənizinə buraxılmışdır.
İl ərzində kənd təsərrüfatında 56824,8 min manatlıq ümumi məhsul istehsal edilmiş, bu sahədə 2008-ci illə müqayisədə 15,2 faiz artım qeydə alınmışdır. Göstərilən dövrdə diri çəkidə 3954 ton ət, 20 min ton süd, 179,6 ton yun, 3 milyon 176 min ədəd yumurta istehsal olunmuş, 2008-ci illə müqayisədə yun istehsalı 8,1 ton, yumurta istehsalı 2 min ədəd artmışdır.
Hesabat dövrundə bütün maliyyə mənbələri hesabına 1396 min manatlıq əsas fondlar istifadəyə verilmiş, rayon iqtisadiyyatının inkişafına 3662,6 min manatlıq əsas kapitala investisiya yönəldilmişdir. İnvestisiya qoyuluşunda dövlət sektorunun payı 2855 manat və ya 77,9 faiz, qeyri-dövlət sektorunun payı isə 807,6 min manat və ya 22,1 faiz olmuşdur.
Şura iclasında çıxış edənlər ötən ilin sosial-iqtisadi inkişaf yekunlarını qiymətləndirməklə yanaşı, cari ildə qarşıya qoyulmuş vəzifələrin də layiqincə yerinə yetiriləcəyini bildirmişlər.
Tədbirdə Prezident Administrasiyasının məsul işçisi Dəyanət Abdullayev çıxış etmişdir.
İclasın iştirakçıları adından Azərbaycan Prezidenti İlham Əliyevə müraciət ünvanlanmışdır.