“NƏSİMİ” MİLLİ ƏDƏBİYYAT MÜSABİQƏSİNİN QALİBLƏRİNƏ MÜKAFATLAR TƏQDİM OLUNMUŞDUR
AZƏRTAC xəbər verir ki, mayın 29-da Beynəlxalq Mətbuat Mərkəzində Kult az. com-Milli Mədəniyyət və Lit. az-Ədəbiyyat portallarının yaradıcıları “Nəsimi” Milli Ədəbiyyat Müsabiqəsinin finalçılarına mükafatlar təqdim etmişlər.
Münsiflər heyətinin üzvü, tənqidçi-publisist Əsəd Cahangir son dövrlərdə ədəbiyyata, incəsənətə qayğının artdığından, Prezident İlham Əliyevin Sərəncamı ilə mədəniyyət, incəsənət xadimlərinə aylıq təqaüdlərin verilməsindən və gənc yazarlara imzasını təsdiq etmək üçün xüsusi imkanlar yaradılmasından danışmışdır.
Natiq ilk dəfə keçirilən bu müsabiqəyə 39 gəncin 120-dən çox əsərinin təqdim edildiyini, iştirakçılar arasında İran (10 nəfər), Rusiya (1 nəfər), Gürcüstan (1nəfər) və Azərbaycan nümayəndələrinin olduğunu bildirmiş, final mərhələsinə 10 nəfərin vəsiqə aldığını söyləmişdir.
Müsabiqənin nəticələri açıqlanarkən, ən yaxşı şeirə görə Cavidan, Rəbiqə Nazim qızı, Dalğa Xatınoğlu, Elmin Həsənli və iranlı Əkbər Şəfii qalib gəldiyi bildirilmişdir.
Ən yaxşı hekayə nominasiyasında Ülviyyə Heydərova, Sevinc Çılğın, Jalə İsmayıl, Mirmehdi Ağaoğlu, İran təmsilçisi İbrahim Sel qalib adını qazanmışlar.
Ülviyyə Heydərova Prezident İlham Əliyevin gənclərə qayğısından və son dövrdə ədəbiyyat sahəsində gənclərin rolunun artmasından danışmış, təqdim olunan mükafatları bütün gəncliyin mükafatı kimi dəyərləndirmişdir.
Qaliblərə diplomlar, xatirə hədiyyələri və görkəmli ədiblərin kitabları təqdim olunmuşdur.
Bölmənin digər xəbərləri
