Nizami rayonunda mülki müdafiənin vəziyyəti ilə bağlı metodiki toplantı keçirilib
Bakı, 29 yanvar, AZƏRTAC
Fövqəladə Hallar Nazirliyinin (FHN) Bakı Regional Mərkəzi yanvarın 29-da “Nizami rayonunda mülki müdafiənin vəziyyəti və 2019-cu ildə qarşıda duran vəzifələr” mövzusunda metodiki toplantı keçirib.
FHN-dən AZƏRTAC bildiriblər ki, tədbirdə çıxış edən rayon icra hakimiyyəti başçısının birinci müavini, rayon fövqəladə hallar komissiyasının sədri Qərib Məmmədov rayonda mülki müdafiənin vəziyyətinin öyrənilməsi, mövcud problemlərin aşkarlanması məqsədilə keçirilən tədbirlərin əhəmiyyətini vurğulayıb. O, fövqəladə halların qarşısının alınması və nəticələrinin aradan qaldırılması istiqamətində görülmüş işlər, eləcə də qarşıda duran vəzifələrdən danışıb.
Bakı Regional Mərkəzinin nümayəndələri rayonda mülki müdafiə işinin təşkili sahəsində görülmüş işlər və 2019-cu ildə qarşıda duran vəzifələr, xəbərdarlıq sistemlərinin, mühəndis mühafizəsinin, kimyəvi mühafizənin vəziyyətinə dair çıxışlar ediblər. Çıxışlarda rayonda yerləşən müxtəlif obyektlərin balansında olan xəbərdarlıq sistemləri, kollektiv mühafizə qurğuları və fərdi mühafizə vasitələrinin vəziyyəti, bu sahədə mövcud çatışmazlıqlar və onların həlli ilə bağlı məsələlər müzakirə olunub.
Toplantıda rayonun aidiyyəti qurumlarının rəhbərləri mülki müdafiənin təşkili ilə bağlı problemlərin həlli istiqamətində həyata keçiriləcək tədbirlər barədə məlumat veriblər.
FHN-in Bakı Regional Mərkəzinin mülki müdafiə idarəsinin rəisi, polkovnik Mirzə Əsgərov mülki müdafiənin təşkili, xəbərdarlıq, fərdi və kollektiv mühafizə vasitələrinin əhalinin təhlükəsizliyinin mühafizəsindəki vacibliyini vurğulayıb, bu sahədə mövcud problemlərin həllinin ən prioritet məsələlərdən olduğunu diqqətə çatdırıb. O, mülki müdafiə işinin gücləndirilməsi istiqamətində görüləcək işlərin səmərəliliyinin artırılması üçün tövsiyələrini bildirib.
Sonda rayonda mülki müdafiə sahəsindəki mövcud çatışmazlıqların aradan qaldırılması üçün aidiyyəti xidmət və qurumların rəhbərlərinə tapşırıqlar verilib.
Bölmənin digər xəbərləri
